لاہور سمیت پنجاب کے 5 بڑے شہروں میں 519کنال اراضی پر ’اپنی چھت اپنا گھر پراجیکٹ کی منظوری دے دی گئی، جس میں کم آمدن والے بے گھر لوگوں کی ہاؤسنگ اسکیم کے لیے 5 شہروں میں اسٹیٹ لینڈ کی نشاندہی کرلی گئی ہے۔
مزید پڑھیں
وزیر اعلیٰ مریم نواز شریف کی زیر صدارت خصوصی اجلاس میں ماڈل گھروں کی تعمیر اور ماہانہ قسط پر بریفنگ دی گئی، گھروں کے نقشوں کے لیے پاکستان کونسل فار آرکیٹیکٹ اینڈ ٹاؤن پلانرزسے مشاورت پر اتفاق کیا گیا۔
وزیراعلیٰ مریم نوازشریف کی ’اپنی چھت اپنا گھر‘ پراجیکٹ شہروں کے قریب لانچ کرنے کی ہدایت کی، وزیراعلیٰ نے حکم دیا کہ کم از کم لاگت میں بہترین گھرتیار کرنے کے لیے اقدامات کیے جائیں۔
اجلاس میں سینئر صوبائی وزیر مریم اورنگزیب، سینیٹر پرویز رشید، وزیر اطلاعات وثقافت عظمیٰ زاہد بخاری، ایم پی اے ثانیہ عاشق، چیف سیکرٹری، ایس ایم بی آر، چیئرمین پی اینڈ ڈی، سیکرٹری ہاؤسنگ، سیکرٹری فنانس، کمشنر لاہور اور دیگر حکام بھی موجود تھے۔
