وزیر اعلیٰ پنجاب مریم نواز شریف نے کہا ہے کہ ہمارا عزم پورے پنجاب کی ترقی ہے، کوئی علاقہ ترقی سے محروم نہیں رہے گا، سب کی وزیر اعلیٰ ہوں، سب ساتھ مل کر چلیں گے ۔
پیر کو وزیر اعلیٰ مریم نواز شریف کی زیر صدارت پارلیمانی پارٹی کا اجلاس منعقد ہوا جس میں پاکستان مسلم لیگ ن ، پیپلز پارٹی ، مسلم لیگ ق اور دیگر ارکان اسمبلی نے شرکت کی۔
اجلاس میں سینیٹ کے الیکشن کی حکمت عملی پر غور اور اس کے طریقہ کار پر بات چیت کی گئی اور پیپلز پارٹی کی خاتون امیدوار کی طرف سے خیر سگالی کے طور دستبردار ہونے کو بھی سراہا گیا ۔ اجلاس میں ارکان اسمبلی نے تجاویز اور سفارشات بھی پیش کیں۔
مزید پڑھیں
اجلاس سے خطاب کرتے ہوئے وزیر اعلیٰ پنجاب مریم نواز شریف نے کہا کہ ’ میں سب کی وزیر اعلیٰ ہوں اس لیے سب کو اپنے ساتھ لے کر چلیں گے، ہمارا عزم پورے پنجاب کی ترقی ہے، اس لیے ہم کسی علاقے کو ترقی سے محروم نہیں رہنے دیں گے۔
اجلاس کے دوران پیپلز پارٹی کے رہنما علی حیدر گیلانی نے کہا کہ سینیٹ انتخاب کے لیے ہماری خاتون امیدوار دستبردار ہوچکی ہیں اس لیے بشریٰ بٹ اور انوشے رحمان کو ووٹ دیں گے۔
استحکام پاکستان پارٹی (آئی پی پی) کے رہنما غضنفر عباس چھیینہ نے بھی کہا کہ وہ مسلم لیگ ن کے امیدوار وں کو ووٹ دیں گے جب کہ محمد اورنگزیب نے کہا کہ سینٹ کے لیے حمایت کرنے پر سب کا شکریہ ادا کرتا ہوں۔
اجلاس میں گفتگو کرتے ہوئے مصدق ملک نے کہا کہ ہر کامیابی کا سہرا قائد محمد نواز شریف کے سر ہے جب کہ بشریٰ انجم نے کہا کہ میں آپ سب کی سینیٹ میں آواز بنو گی، انوشے رحمان نے کہا کہ اعتماد کرنے پر پارٹی قیادت کا شکریہ ادا کرتی ہوں۔
اجلاس میں سینیٹ امیدوار محمد اورنگزیب ، مصدق ملک، خلیل طاہر سندھو بشریٰ انجم بٹ، انوشا رحمان، سینیئر منسٹر مریم اور رنگ زیب اور دیگر رہنما بھی موجود تھے۔
