لارا دتہ نے اپنی پہلی فلم ’انداز‘ کی تشہیر کے دوران دہلی کے چاندنی چوک میں پیش آنے والے ایک واقعے کو یاد کیا، جب انہوں نے چھیڑ خوانی پر ایک شخص کی خوب پٹائی کی تھی۔
اداکارہ اور سابق مِس یونیورس لارا دتہ ایسی شخصیت کو طور پر جانی جاتی ہیں جو ادھار باقی نہیں رکھتیں۔ انہوں نے کہا کہ مجھے گھورے جانے اور چھیڑ چھاڑ کے بہت سے واقعات کا سامنا کرنا پڑا، اور میں نے ان کے بارے میں بات بھی کی ہے۔ ایک حالیہ انٹرویو میں انہوں نے بتایا کہ کس طرح 2003 میں انہوں نے اپنی پہلی فلم ’انداز‘ کی تشہیر کے دوران بھیڑ میں موجود پرستار کو تشدد کا نشانہ بنایا تھا۔
مزید پڑھیں
ان کا کہنا تھا کہ میری پہلی فلم ’انداز‘ کی میوزک ریلیز کے دوران پریانکا چوپڑا، اکشے کمار اور میں دہلی کے چاندنی چوک کے رتھم ہاؤس گئے تھے۔ میں نے ساڑھی پہن رکھی تھی، جب ہم رتھم ہاؤس میں داخل ہونے کی کوشش کر رہے تھے تو مس ورلڈ (پریانکا) اور مس یونیورس پہلی بار اسکرین پر ایک ساتھ آنے کی وجہ سے بہت بڑا ہجوم جمع ہو گیا تھا۔ ہمارے ساتھ اکشے بھی تھے۔
اسی بھیڑ میں کسی نے مجھے چٹکی کاٹی، مجھے احساس ہوا کہ کچھ غلط ہوا ہے، میری فوجی فیملی اور تربیت کا نتیجہ تھا کہ میں نے پلٹ کر اسے کھینچ لیا اور وہ سڑک پر گر گیا۔ پھر میں نے اسے بُری طرح پیٹا۔ اکشے بہت پریشان ہوا، اس نے مجھے کھینچ لیا اور کہا آپ اداکارہ ہیں، آپ یہ سب نہیں کرسکتیں (ہنستے ہوئے)۔
لارا دتہ نے مزید بتایا کہ ان کے پاس پائپ لائن میں بہت سے پروجیکٹس ہیں۔ جن میں ویلکم ٹو، دی جنگل، سوریہ ست اور رامائن شامل ہیں۔ وہ ویلکم ٹو میں اپنے پہلے ساتھی اداکار اکشے کے ساتھ جلوہ گر ہوں گی۔
