عالمی مالیاتی ادارے آئی ایم ایف نے پاکستان کے لیے 1.1 ارب ڈالر کی آخری قسط کی منظوری دیدی۔
وزارت خزانہ کے ذرائع کے مطابق آئی ایم ایف ایگزیکٹو بورڈ کے اجلاس میں پاکستان کو آخری قسط جاری کرنے کی منظوری دی گئی ہے۔
مزید پڑھیں
ذرائع کا بتانا ہے کہ آئی ایم ایف سے پاکستان کو 1.1 ارب ڈالر اسی ہفتے جاری ہونے کا امکان ہے۔
واضح رہے کہ گزشتہ برس پاکستان نے آئی ایم ایف کے ساتھ اسٹینڈ بائی معاہدہ کیا تھا جس کے مطابق یہ تیسری اور آخری قسط ہے۔ اس سے قبل پاکستان 1.9 ارب ڈالر وصول کرچکا ہے۔
دوسری جانب حکومت آئی ایم ایف سے ایک اور پروگرام لینے کا فیصلہ کرچکی ہے جس کے لیے مذاکرات کا آغاز بھی ہوگیا ہے۔
وزیر خزانہ محمد اورنگزیب نے گزشتہ دنوں نے کہا تھا کہ جون یا جولائی میں آئی ایم ایف کے ساتھ اسٹاف لیول معاہدہ ہو جائے گا۔
گزشتہ روز سعودی عرب کے شہر ریاض میں وزیراعظم پاکستان شہباز شریف کی آئی ایم ایف کی مینیجنگ ڈائریکٹر سے بھی ملاقات ہوئی جس میں نئے قرض پروگرام پر تبادلہ خیال کیا گیا۔