قومی ٹیم کے فاسٹ بولر محمد عامر آئرلینڈ کے خلاف پہلے ٹی20 میچ سے باہر ہوگئے۔ آئرلینڈ کیخلاف سیریز کے لیے قومی ٹیم نے ڈبلن میں ڈیرے ڈال دیے ہیں تاہم ویزا جاری نہ ہونے کی وجہ سے محمد عامر پہلے میچ میں شرکت نہیں کرسکیں گے۔
فاسٹ بولر محمد عامر کو آئرلینڈ کا ویزا تاحال نہیں مل سکا ہے جس کی وجہ سے وہ آئرلینڈ کے خلاف جمعہ کو شیڈول پہلے ٹی20 میچ سے باہر ہوگئے۔ ویزے کی وجہ سے محمد عامر ٹیم کے ہمراہ آئرلینڈ روانہ نہیں ہوسکے تھے۔
مزید پڑھیں
32 سالہ عامر نے گزشتہ ماہ نیوزی لینڈ کے خلاف ٹی 20 سیریز کے دوران 4سال بعد انٹرنیشنل کرکٹ میں واپسی کی جہاں انہوں نے 4میچز میں قومی ٹیم کی نمائندگی کی انہیں آئرلینڈ اور انگلینڈ کے خلاف ٹی20 سیریز کے لیے پاکستانی ٹیم میں شامل کیا گیا ہے۔
محمد عامر برطانوی شہری نرجس سے شادی کی وجہ سے برطانیہ کے مستقل رہائشی بن گئے ہیں، وہ 2018 میں پہلے ہی آئرلینڈ کا دورہ کرچکے ہیں لیکن اس سال انہیں ویزا نہیں ملا ہے۔
پی سی بی کرکٹ آئرلینڈ کے ساتھ مسلسل رابطے میں ہے کیونکہ بورڈ کا خیال ہے کہ ویزے کے بروقت اجرا کو یقینی بنانا میزبانوں کی ذمہ داری ہے، محمد یوسف کا ویزا بھی تاخیر کا شکار ہوا لیکن انہیں ٹیم کے ساتھ سفر کرنے کے لیے بروقت ویزا مل گیا تھا۔
پی سی بی اور محمد عامر دونوں ہی ویزے کے منتظر ہیں کیونکہ قومی اسکواڈ اس وقت آئرلینڈ میں موجود ہے جبکہ محمد عامر کا ویزا ابھی گتک جاری نہیں ہوا، قومی ٹیم آئرلینڈ میں 3 ٹی20 میچز کھیلے گی۔
