خوبصورت جزیروں اور دلفریب ساحلوں کی وجہ سے دنیا بھر میں مشہور تھائی لینڈ کے سمندر کا نیلا اور سبزی مائل پانی ہر سال لاکھوں سیاحوں کو اپنی طرف کھینچ لاتا ہے لیکن ہر طرف سے پانی میں گھرے ان جزائر کو اب خود میٹھے پانی کی کمی کا مسئلہ درپیش ہے۔
غیر ملکی خبررساں ادارے کی رپورٹ کے مطابق ٹورازم آفیشل اور مقامی افرادکا کہنا ہے کہ ایشیا میں گرمی کی شدت کے باعث تھائی لینڈ کے مشہور جزیروں میں بھی پانی کی شدید قلت ہوگئی ہے۔
مزید پڑھیں
تھائی لینڈ کے فی فی اور ساموئی جزیروں کا شمار مشہور جزیروں میں ہوتا ہے، فی فی آئی لینڈ پر تو ہالی وڈ فلم ‘دی بیچ’ کی شوٹنگ بھی ہوئی تھی جس کی وجہ سے یہ جزیرہ خاصا مشہور ہے۔ حالیہ موسم گرما کے دوران ہیٹ ویوز کے باعث خطے میں درجہ حرارت ریکارڈ سطح تک پہنچ گیا تھا جب کہ طویل عرصے تک کم بارشیں ہونے کے باعث آبی ذخائر بھی خشک ہورہے ہیں۔
ہوٹلوں کی ایسوسی ایشن کے صدر ویچوپن فوکاؤلوان سیر سانیا نے بتایا کہ جزیروں کو پانی فراہم کرنے والی نجی کمپنی کسی بھی وقت کام روک سکتی ہے۔
انہوں نے کہا کہ جزیرے کے عہدیدار اس بات پر بھی غور کرچکے ہیں کہ اگر خشک موسم جاری رہتا ہے تو مین لینڈ سے پانی منگوایا جاسکتا ہےلیکن انہیں امید ہے کہ مئی میں بارشوں سے صورتِ حال بہتر ہو جائے گی۔
