قومی و صوبائی اسمبلیوں کی مخصوص نشستوں پر ارکان کی رکنیت معطل، نوٹیفیکیشن جاری

الیکشن کمیشن آف پاکستان نے قومی و صوبائی اسمبلی کی مخصوص نشستوں پر ارکان کی رکنیت معطل کردی۔

الیکشن کمیشن کے جاری کردہ نوٹیفیکیشن کے مطابق، قومی و صوبائی اسمبلیوں کی کل 77 مخصوص نشستوں پر ارکان کی رکنیت معطل کی گئی ہے۔ معطل کردہ نشستوں میں خواتین کی 66 اور اقلیتوں کی 11 نشستیں شامل ہیں۔

خیبر پختونخوا سے قومی اسمبلی کی 8 خواتین اراکین جبکہ پنجاب سے قومی اسمبلی کی 11 خواتین اراکین کو معطل کیا گیا ہے۔ قومی اسمبلی میں 3 اقلیتی نشستوں کے اراکین کو بھی معطل کیا گیا ہے۔

خیبر پختونخوا اسمبلی سے 21 مخصوص خواتین اراکین کے علاوہ اقلیتوں کے 4 اراکین کو بھی معطل کیا گیا ہے۔ اسی طرح پنجاب اسمبلی میں خواتین کی 24 اور اقلیتوں کی 3 نشستوں پر ارکان کی رکنیت معطل کردی۔

سندھ اسمبلی میں خواتین کی 2 اور اقلیتوں کی ایک نشست پر ارکان کی رکنیت معطل ہوئی ہے۔

کس جماعت کی کتنی سیٹیں کم ہوئیں؟

قومی اسمبلی میں مسلم لیگ ن کی 13 خواتین اور ایک اقلیتی نشست کم ہوگئی۔ قومی اسمبلی میں پیپلز پارٹی کی 5 اور جمیعت علمائے اسلام (جے یو آئی) ف کی 3 نشستیں کم ہوگئیں۔

خیبرپختونخوا اسمبلی میں جے یو آئی کی 10، ن لیگ کی 6 نشستیں کم ہوئیں۔ اسی طرح خیبرپختونخوا اسمبلی میں پیپلز پارٹی کی 7 نشستیں کم ہوگئیں۔