پنجاب میں ’چیف منسٹر اسکلز ڈویلپمنٹ پروگرام‘ کا آغاز، کتنی طالبات شامل ہوئیں؟

وزیراعلیٰ پنجاب مریم نواز نے کہا ہے کہ مسلم لیگ ن کبھی بچوں کے ہاتھ میں پیٹرول بم نہیں دیے، ہم نوجوانوں کو ہنر مند بنا رہے ہیں تاکہ ان کو باعزت روزگار مل سکے۔

لاہور میں ’چیف منسٹر اسکلز ڈویلپمنٹ پروگرام‘ کے آغاز کے موقع پر تقریب سے خطاب کرتے ہوئے وزیراعلیٰ نے کہاکہ اسکلز ڈویلپمنٹ میں بہت بڑی تعداد بچیوں کی آئی ہے، ایک ہزار بچے منتخب ہوئے ہیں جن میں 400 لڑکیاں ہیں۔

انہوں نے کہاکہ افسوس ہم کئی دہائیوں سے گھسے پٹے سسٹم پر چل رہے ہیں، مارکیٹ کے مطابق کورسز ہوں گے تو نوکریاں بھی ملیں گی۔

وزیراعلیٰ پنجاب نے کہاکہ ہم نے طلبا و طالبات کو بائیکس دینے کا فیصلہ بھی کیا ہے اور جلد اس پر عملدرآمد ہو جائے۔

مریم نواز نے تقریب کے دوران لاہور ہائیکورٹ کے جج پر تنقید کرتے ہوئے کہاکہ کہ حکومت نے الیکٹرک بائیکس دینے کا فیصلہ کیا تو ایک جج صاحب کہہ رہے تھے کہ اب لڑکے یہ لے کر بچیوں کے کالج کے باہر جائیں گے۔

انہوں نے کہاکہ ن لیگ نے بچوں کو یہ نہیں سکھایا کہ فورسز پر حملہ کردیں، 9 مئی کو جب میں جناح ہاؤس گئی تو دل خون کے آنسو رو رہا تھا۔