ملک کی معروف اداکار و پروڈیوسر جوڑی جویریہ اور سعود (قاسمی) کے بچوں جنت اور ابراہیم سعود نے کوک ٹی وی چینل کے لیے کام کرنے سے انکار کردیا۔
مزید پڑھیں
جویریہ سعود نے اپنی انسٹاگرام پوسٹ میں بتایا کہ ان کے بچوں جنت سعود اور ابراہیم سعود کو کوک ٹی وی سی میں پرفارم کرنے کی پیشکش ہوئی لیکن انہوں نے فلسطینی مسلمانوں کے خلاف سرگرم اسرائیل کی حمایت کرنے والی کمپنی کے ساتھ کام کرنے کو اپنے اصولوں پر سمجھوتے بازی گردانتے ہوئے وہ پیشکش ٹھکرادی۔
ان کا کہنا تھا کہ بچوں نے نہ صرف خود انکار کیا بلکہ انہیں اور سعود کو بھی قائل کیا کہ وہ اس شوٹ کا حصہ نہ بنیں۔
View this post on Instagram
جویریہ سعود نے کہا کہ جنت اور ابراہیم نے ہمیں بتایا کہ اگر ہم (فلسطینی مسلمانوں کے لیے) کچھ اور نہیں کر سکتے تو کم از کم بائیکاٹ کر کے اپنا چھوٹا سا کردار ادا کر سکتے ہیں۔
انہوں نے کہا کہ اس بات پر انہیں سورہ الفیل کا خیال آیا۔ انہوں نے دعا کی کہ’اللہ تعالیٰ سب کو ایسے ایماندار اور اصول پسند بچے عطا فرمائے، آمین‘
واضح رہے کہ جویریہ ایک منجھی ہوئی اداکارہ و پروڈیوسر کے علاوہ اسکرین رائٹر اور ٹی وی میزبان بھی ہیں۔ ان کے شوہر سعود نے 150 سے زائد فلموں کے ساتھ ساتھ متعدد ٹیلی ویژن سیریلز میں بھی کام کیا ہے۔
یاد رہے کہ اکتوبر 2023 سے غزہ پر جاری اسرائیلی جارحیت کے خلاف دنیا بھر میں کئی برینڈز کے بائیکاٹ کا اعلان کیا گیا ہے جن میں میکڈونلڈ اور کے ایف سی کے علاوہ کوکا کولا، نیسلے اور دیگر برانڈز بھی شامل ہیں۔
ایسے موقع پر جب دنیا بھر میں اسرائیلی پراڈکٹس کا بائیکاٹ کیا جا رہا ہے صارفین کو کوک اسٹوڈیو سیزن 15 کا آغاز ناگوار گزرا ہے۔ یہی وجہ ہے کہ صارفین کی ایک بڑی تعداد اس کے بائیکاٹ کا مطالبہ کر رہی ہے اور ’بائیکاٹ کوک اسٹوڈیو‘ کی مہم چلائی جا رہی ہے۔
علاوہ ازیں فلسطین میں اسرائیلی جبرواستبداد کے 200 روز کے بعد پاکستان کی شہری مارکیٹ میں ملٹی نیشنل کمپنیز اپنی مصنوعات کے بائیکاٹ کے حوالے سے خاصے دباؤ میں نظر آئیں۔
پلس کنسلٹنٹ کے ایک سروے کے مطابق فلسطینی تنازعے کے 200 سے زائد دنوں کے بعد پاکستانی صارفین خصوصاً خواتین میں ایک بار پھر بائیکاٹ کی حمایت کی طرف جھکاؤ دکھائی دے رہا ہے۔
