معروف نجی ہاؤسنگ سوسائٹی بحریہ ٹاؤن کے دفتر پر نیب ٹیم کے چھاپے کے بعد سوسائٹی کے ملک ریاض نے اپنے ردعمل میں کہا ہے کہ جو چاہے ظلم کرلو میں وعدہ معاف گواہ نہیں بنوں گا۔
ملک ریاض وعدہ معاف گواہ نہیں بنے گا۔۔جو چاہے مجھ پر ظلم کرو۔ pic.twitter.com/ryEq9sOarM
— Malik Riaz Hussain (@MalikRiaz_) May 28, 2024
واضح رہے کہ کچھ دیر قبل قومی احتساب بیورو (نیب) کی ٹیم نے بحریہ ٹاؤن کے راولپنڈی دفتر پر چھاپہ مارا ہے۔
ذرائع کے مطابق چھاپہ القادر ٹرسٹ یونیورسٹی کا ریکارڈ حاصل کرنے کے لیے مارا گیا، پولیس اور نیب کی ٹیم بحریہ ٹاؤن راولپنڈی کے فیز ٹو آفس میں موجود ہیں۔
ذرائع کے مطابق نیب ٹیم بحریہ ٹاؤن کے دفتر کے مختلف حصوں کی تلاشی لے رہی ہے جبکہ عملے سے بھی پوچھ گچھ کی جارہی ہے۔
واضح رہے کہ بحریہ ٹاؤن کے مالک ملک ریاض 190 ملین پاؤنڈ اسکینڈل میں ملزم نامزد ہیں۔
2 روز قبل بحریہ ٹاؤن کے مالک ملک ریاض حسین نے کہا تھا کہ اللہ تعالیٰ نے ساری زندگی مجھے اپنے اصول پر قائم رہنے کی رہنمائی کی ہے کہ میں کسی بھی معاملے میں سیاسی فریق نہ بنوں۔ اب ایک سال سے زیادہ عرصے سے مجھ پر سمجھوتا کرنے کے لیے بہت دباؤ ہے، لیکن میں کبھی بھی کسی کو اجازت نہیں دوں گا کہ وہ مجھے سیاسی مقاصد کے لیے پیادے کے طور پر استعمال کرے۔
