بلوچستان کے شہر چمن میں پولیو ٹیم پر حملے کے نتیجے میں خاتون پولیو ورکر سمیت 2 لیویز اور ایک پولیس اہلکار زخمی ہوگئے ہیں۔
تفصیلات کے مطابق صوبہ بلوچستان کے شہر چمن میں دھرناکمیٹی کے ڈنڈابردارافراد نے پولیو ٹیم پر حملہ کے دوران پولیس اور لیویز اہلکاروں سے اسلحہ چھیننے کی کوشش بھی کی۔
مزید پڑھیں
ڈپٹی کمشنر راجا اطہر عباس نے بتایا ہے کہ مسلح افراد کے حملے میں خاتون پولیوورکر، 2 لیویز اور ایک پولیس اہلکارزخمی ہوگئے ہیں۔ علاقے میں مزید نفری روانہ کر دی گئی ہے، پولیومہم میں رکاوٹ ڈالنے والوں کیخلاف قانونی کارروائی ہوگی۔
ترجمان بلوچستان حکومت شاہد رند نے چمن میں پولیو ٹیم پر حملے کی مذمت کرتے ہوئے کہا کہ لیویز اہلکاروں سے اسلحہ اور پولیو ٹیم سے ویکسین چھیننے کی کوشش کی گئی، ضلعی انتظامیہ حملے میں ملوث عناصر کے خلاف کارروائی کررہی ہے۔
ترجمان صوبائی حکومت کا کہنا تھا کہ احتجاج آئینی حق تاہم تشدد کا راستہ اختیار کیا جاتا ہے تو ریاست قانون کے مطابق کارروائی کرے گی، کسی کو قانون ہاتھ میں لینے کا اختیار نہیں، ملزمان پرانسداد دہشت گردی کے دفعات کے تحت مقدمہ درج کیا جائے گا
واضح رہے کہ آج ملک بھرکے 67 مخصوص اضلاع میں انسداد پولیومہم کا آغاز کیا گیا ہے، مہم کےدوران ایک کروڑ 65 لاکھ بچوں کو پولیو سے بچاؤ کے قطرے پلانے کا ہدف مقرر کیا گیا ہے۔
بلوچستان کے 14 اضلاع میں بھی انسداد پولیو مہم شروع کی گئی ہے، جہاں 18 لاکھ سے زیادہ بچوں کو پولیو سے بچاؤ کے قطرے پلائے جائیں گے تاہم 6 اضلاع میں ہیٹ ویوکی پیشگوئی کے باعث مہم 5 روز کے لیے مؤخر کردی گئی ہے، ان اضلاع میں انسدادِ پولیو مہم 8 جون سےشروع ہوگی۔
