خیبرپختونخوا حکومت نے ملک میں جاری سخت گرمی کی لہر کے باعث سیاحوں کی بہت بڑی تعداد میں صوبے کے بالائی اور شمالی علاقہ جات کی سیاحت کے پیشِ نظر عیدالاضحی کی چھٹیوں کے ایام میں بھی سیاحوں کو سیکیورٹی اور دیگر سفری سہولیات مہیا کرنے کے لیے پوری انتظامی مشینری کو فعال بنانے کے لیے ہدایات جاری کی ہیں۔
مزید پڑھیں
اے پی پی کے مطابق ضمن میں وزیراعلیٰ خیبرپختونخوا سردار علی امین گنڈاپور، مشیر سیاحت و ثقافت زاہد چن زیب اور چیف سیکریٹری ندیم اسلم چوہدری کی ہدایات کے تحت سیکریٹری سیاحت محمد بختیار خان نے ہزارہ ڈویژن کے کمشنر، ریجنل پولیس آفیسرز، متعلقہ تمام اضلاع کے ڈپٹی کمشنرز، کلچر اینڈ ٹورازم اتھارٹی کے ڈائریکٹر جنرل اور ڈویلپمنٹ اتھارٹیز کے سربراہان کو واضح طور پر خبردار کیا ہے کہ وہ اس ضمن میں ضروری انتظامات کریں۔
ایک اور حکمنامے میں سیکریٹری سیاحت خیبرپختونخوا نے صوبائی کلچر اینڈ ٹورازم اتھارٹی، گلیات، کاغان ڈویلپمنٹ اتھارٹیز کے سربراہان کو ہدایت کی ہے کہ وہ سیاحوں کی سہولت کے لیے فیلیسیٹیش سنٹرز دن رات کھلے رکھیں۔
یہ ہدایات بھی جاری کی گئی ہیں کہ ٹورازم پولیس معروف سیاحتی مقامات پر مقامی ٹریفک پولیس کے ساتھ مربوط ٹریفک انتظامات یقینی بنائیں، شاہراہوں کی کلیئرنس کے لیے بھاری مشینری بھی تیار رکھیں اور مقامی بازاروں اور مارکیٹوں میں صحت و صفائی، واش رومز اور آبنوشی کا مناسب انتظام کریں۔
ان ہدایات کی روشنی میں کئی اضلاع اور مصروف سیاحتی مقامات پر ملازمین کی عید کی چھٹیاں بھی منسوخ کر دی گئی ہیں۔
