وزیراعلیٰ پنجاب مریم نواز شریف اور صدر پاکستان مسلم لیگ (ن) محمد نواز شریف سے اسلامی جمہوریہ ایران کے سفیر ڈاکٹر رضا امیری مقدم نے ملاقات کی ہے۔ باہمی دلچسپی کے امور سمیت تجارتی، ثقافتی، اقتصادی اور سماجی تعلقات پر گفتگو کی گئی۔ پاک ایران بارڈر آف سیکیورٹی کو بارڈر آف اکانومی بنانے کی تجویز اور اصفہان، مشہد اور لاہور کے جڑواں شہروں کے ثقافتی روابط مزید بڑھانے پر اتفاق کیا گیا۔
وزیراعلیٰ آف سے جاری بیان کے مطابق ایران اور پنجاب کے درمیان زراعت، لائیو اسٹاک اور دیگر شعبوں میں تعاون کے امکانات جائزہ لیا گیا اور ایران کی پنجاب سے گوشت کی امپورٹ 40 فیصد سے 70 فیصد تک بڑھانے پر اتفاق کیا گیا۔ پاکستان اور ایران کے درمیان باہمی تجارت 10 ارب ڈالر تک بڑھانے کے معاہدے میں پنجاب کے تجارتی کردار پر بھی تفصیلی گفتگو ہوئی۔
مزید پڑھیں
پنجاب میں فارسی زبان کے فروغ کے لیے مختلف تجاویز پر بھی غور کیا گیا جبکہ ایرانی سفیر ڈاکٹر رضا امیری مقدم نے وزیراعلیٰ مریم نواز شریف کو دورہ ایران کا تحریری دعوت نامہ پیش کیا، ایران کے سفیر نے صدر پاکستان مسلم لیگ (ن) محمد نوازشریف کو بھی دورہ ایران کی دعوت دی۔
وزیراعلیٰ مریم نواز اور محمد نوازشریف نے ایرانی صدر ابراہیم رئیسی کی شہادت پر رنج کا اظہار کرتے ہوئے کہا کہ ایرانی صدر اور ان کے رفقا کی شہادت پر ایران کے عوام کے دکھ کو دل سے محسوس کرتے ہیں۔ مریم نوازشریف نے کہا کہ شہید ایرانی صدر ابراہیم رئیسی سے ملاقات یادگار رہی، ان کی شخصیت متاثر کن تھی، صدر رئیسی سے ون آن ون ملاقات میں تجارتی، ثقافتی تعلقات کے فروغ پر سود مند گفتگو ہوئی تھی۔
ایرانی سفیر کا کہنا تھا کہ پاکستان کے ممنون ہیں، پاکستانی عوام نے دوستی کا پورا حق ادا کیا۔ شہید ایرانی صدر ابراہیم رئیسی محمد نوازشریف سے ملاقات کے متمنی تھے لیکن دورہ چین کی وجہ سے ملاقات نہیں ہوسکی۔ پاکستان ایران کے لیے بہت خاص اہمیت رکھتا ہے۔
ایرانی سفیر نے مزید کہا کہ شہید صدر ابراہیم رئیسی کے دورے کے دوران ہونے والے معاہدوں اور ایم او یو کا تسلسل برقرار رہے گا۔ ایرانی سفیر نے مریم نوازشریف کو خاتون وزیراعلیٰ پنجاب کی حیثیت سے 100دن کامیابی سے مکمل کرنے پر مبارکباد بھی پیش کی۔
