خیبر پختونخوا کے ضلع مردان میں دھماکے سے 3 افراد جاں بحق جبکہ پولیس اہلکاروں اور خاتون سمیت 8 افراد زخمی ہو گئے ہیں۔
ریسکیوسروس کے مطابق دھماکا تخت بھائی میں جلالہ پل کے قریب ہوا ہے جس کے بعد فوری طور پر امدادی سرگرمیاں بھی شروع کر دی گئی ہیں۔
ریسکیو ترجمان نے بتایا کہ ابتدائی طور پر 3 لاشوں سمیت 8 زخمیوں کو اسپتال منتقل کردیا گیا ہے، زخمیوں میں پولیس اہلکار سمیت خاتون بھی شامل ہیں۔
مردان پولیس کے ایک افسر نے وی نیوز کو بتایا کہ دھماکا سڑک کنارے نصب بم پھٹنے کے باعث ہوا، جس کی مزید تفتیش کی جارہی ہے، بم ڈسپوزل یونٹ کی ٹیم جائے وقوعہ پر موجود ہے، جو مکمل تحقیقات کے بعد رپورٹ مرتب کرے گی۔
پولیس آفیسر نے بتایا کہ دھماکا اس وقت ہوا جب پولیس موبائل وین وہاں سے گزر رہی تھی، دھماکے کے نتیجے میں 2 پولیس اہلکار بھی زخمی ہو گئے ہیں جبکہ ایک رکشہ بھی دھماکے کی زد میں آ یا، جس میں سوار دو مسافر ہلاک ہو گئے ہیں۔
