مخصوص نشستوں پر سپریم کورٹ آف پاکستان کے فیصلے کے بعد سنی اتحاد کونسل کے سربراہ صاحبزادہ حامد رضا نے کہا کہ چیف الیکشن کمشنر فوری طور پر مستعفی ہوجائیں۔
سپریم کورٹ کے باہر میڈیا سے گفتگو کرتے ہوئے انہوں نے کہا کہ آج سپریم کورٹ کی جانب سے سنایا جانے والا فیصلہ عمران خان کی جیت ہے اور آج کا دن عمران خان کے نام ہے۔
انہوں نے مزید کہا کہ آج یہ فیصلہ کرکے ججز نے اس ادارے کے احترام میں اضافہ کیا ہے اور آج سپریم کورٹ نے بھی یہ ثابت کردیا کہ چیف الیکشن کمشنر کا فیصلہ غلط تھا، لہٰذا اس فیصلے کے بعد چیف الیکشن کمشنر فوری طور پر اپنے عہدے سے مستعفی ہوجائیں۔
مزید پڑھیں: سپریم کورٹ کا مخصوص نشستیں پی ٹی آئی کو دینے کا فیصلہ
واضح رہے کہ سپریم کورٹ کے فل بینچ نے پارلیمنٹ کی مخصوص نشستوں کے حصول کے لیے تحریک انصاف کی حمایت یافتہ سنی اتحاد کونسل کی درخواست پر مقدمے کا محفوظ شدہ فیصلہ سناتے ہوئے کہا کہ قومی اسمبلی کی مخصوص نشستیں پی ٹی آئی کا حق ہیں اور انہیں واپس کی جائیں۔
8 ججوں کے مقابلے میں 5 کی مخالفت سے اکثریتی فیصلہ جسٹس منصورعلی شاہ نے سنایا، جس کے مطابق پی ٹی آئی کی مخصوص نشستیں حکومتی اتحاد میں شامل جماعتوں کو دینے اور پشاور ہائیکورٹ کی جانب سے اسے برقرار رکھنے کے دونوں فیصلے بھی کالعدم قرار دیدیے ہیں۔
مخصوص نشستوں سے متعلق محفوظ شدہ فیصلے میں کہا گیا ہے کہ مخصوص نشستیں تحریک انصاف کا حق تھیں، پی ٹی آئی سیاسی جماعت تھی اور ہے، آئین کے مطابق کسی بھی سیاسی جماعت سے انتخابی نشان نہیں لیا جا سکتا۔
مزید پڑھیں: مخصوص نشستیں: ریلیف مانگنے سنی اتحاد کونسل گئی تھی مگر ریلیف پی ٹی آئی کو دے دیا گیا، وزیر قانون
الیکشن کمیشن کا مخصوص نشستوں سے متعلق نوٹیفکیشن کالعدم قرار دیتے ہوئے سپریم کورٹ نے اپنے فیصلے میں کہا ہے کہ انتخابی نشان واپس لینا سیاسی جماعت کو انتخابات سے باہر نہیں کرسکتا، انتخابی نشان ختم ہونے سے کسی جماعت کا الیکشن میں حصہ لینے کاحق ختم نہیں ہوتا۔
