علیمہ خان نے کہا ہے کہ ان کے بھائی اور سابق وزیر اعظم عمران خان نے جنرل عاصم منیر سے درخواست کی ہے کہ وہ ملک کی خاطر نیوٹرل ہوجائیں اور اس ملک کو چلنے اور سنورنے دیں۔
یہ بھی پڑھیں: عمران خان کا آرمی چیف کے نام پیغام، یہ راستہ نکالنے کے لیے جال بن رہے ہیں، رانا ثنا اللہ
اڈیالہ جیل کے باہر وکلا کے ہمراہ میڈیا سے گفتگو میں علیمہ خان کا کہنا تھا کہ عمران خان نے پیغام بھیجا ہے کہ درخواست ہی کی جاسکتی ہے کہ جنرل عاصم منیر نیوٹرل ہوجائیں۔ ’آپ نیوٹرل ہوں گے، اس ملک کو چلنے دیں، اسے اپنا آپ سنوارنے دیں۔‘
عمران خان کی آرمی چیف جنرل عاصم منیر سے نیوٹرل ہونے کی اپیل۔ لیکن بقول عمران خان کے 'نیوٹرل تو جانور' ہوتے ہیں۔ کیا یہ کھلا تضاد نہیں؟ pic.twitter.com/isneQ4H4SM
— Wajahat Kazmi (@KazmiWajahat) July 26, 2024
علیمہ خان کے مطابق عمران خان کا دوسرا پیغام 9 مئی سے متعلق ہے، انہوں نے کہا ہے کہ سیدھی سی بات ہے اس کیس میں کچھ بھی نہیں ہے۔
’آپ نے صرف یہ کرنا ہے کہ 9 مئی کی ساری سی سی ٹی وی فوٹیج نکالیں اور کیس چلائیں، اس میں آپ کو سب نطر آجائے گا کہ کون ذمہ دار تھے اس کے، لیکن اس کی فوٹیج کے بغیر آپ کو پتا نہیں چلے گا۔‘
مزید پڑھیں: عمران خان کا پیغام ہے، قوم نئے انتخابات کی تیاری کرے، عمرایوب
علیمہ خان کا کہنا تھا ان سمیت ہزاروں لوگ اس کیس میں ملوث ہیں، جبکہ بیشتر بے گناہوں کو جیل میں ڈالا ہوا ہے، انہیں رہا کیا جائے اور سی سی ٹی وی فوٹیج کی مدد سے کیس چلا کر ذمہ داروں کیخلاف کارروائی کی جائے۔
’۔۔۔لیکن جو بے گناہ لوگ ہیں انہیں چھوڑا جائے، عمران خان ہر مرتبہ کہتے ہیں جو لوگ بے گناہ ہیں انہیں آپ رہا کریں۔‘
مزید پڑھیں: رانا ثنا اللہ کا پی ٹی آئی سے بات کرنے کا بیان درست قدم ہے، فواد چودھری
علیمہ خان کے مطابق آج عمران خان سے ان کی ملاقات ایک گھنٹہ جاری رہی، جس کے اختتام پر ان کے یہی دو پیغامات تھے کہ مقدمات چلائے جائیں اور جنرل عاصم منیر نیوٹرل ہوجائیں۔
