5 اگست کو پاکستان سمیت دنیا بھر میں موجود کشمیری یوم استحصال کشمیر منائیں گے، یہ دن کشمیرپر بھارت کے ناجائز قبضے اور 2019 میں بھارت کی جانب سے مقبوضہ کشمیر کی خصوصی حیثیت ختم کرنے کیخلاف بطور یوم سیاہ منایا جاتا ہے۔
امسال بھی وزیراعظم شہبازشریف یوم استحصال کشمیر کے موقع پر اہم پالیسی بیان دیں گے، ان کا مظفرآباد کا دورہ بھی متوقع ہے۔
یہ بھی پڑھیں: یوم استحصال: جب مقبوضہ کشمیر کی خصوصی حیثیت ختم کی گئی تب پاکستان کا ردعمل کیا تھا؟
وزیر اعظم آفس کے میڈیا ونگ سے جاری بیان کے مطابق گزشتہ روز وزیراعظم شہبازشریف کی زیرصدارت یوم استحصال کی تیاریوں کے حوالے سے خصوصی اجلاس منعقد ہوا۔
اجلاس میں وفاقی وزرا، مشیروں اور اعلی سرکاری حکام نے شرکت کی، اجلاس میں وزیراعظم شہباز شریف کو یوم استحصال کے حوالے سے تیاریوں پر تفصیلی بریفنگ بھی دی گئی۔
یوم استحصال بھارت کی جانب سے 5 اگست 2019 کو غیر قانونی طور پر جموں و کشمیر کی خصوصی حیثیت کو ختم کرنے کے خلاف اور کشمیریوں کے آزادی کے حق کی حمایت کے خصوصی دن کے طورپر منایا جائے گا۔
یوم استحصال پر جموں و کشمیر کے تنازعے، کشمیریوں کے بنیادی حقوق کی خلاف ورزیوں اور بھارتی وعدہ خلافیوں کو اجاگر کیاجائے گا۔
یہ بھی پڑھیں: یومِ استحصال: بھارت 5 اگست 2019 کا غیر قانونی اقدام واپس لے، پاکستان کا مطالبہ
پاکستانی اور کشمیری قیادت کی مشترکہ مرکزی تقریب کا انعقاد کیا جائے گا،وزیراعظم شہبازشریف کا 5 اگست کو کشمیریوں کے ساتھ یک جہتی کے اظہار کے لیے مظفرآباد جانے کا بھی امکان ہے۔
وزیراعظم 5 اگست 2019 کے یک طرفہ اور غیرقانونی بھارتی اقدامات کی بھرپور مذمت کریں گے، وزیراعظم شہبازشریف یوم استحصال پر اہم پالیسی بیان بھی دیں گے۔
یوم استحصال پر خصوصی واک ہوگی، وفاق سمیت چاروں صوبوں، آزاد جموں وکشمیر اور گلگت بلتستان میں خصوصی تقاریب ہوں گی، خصوصی نشریات چلائی جائیں گی، تحریک آزادی کشمیر کے قائدین، کشمیریوں کی قربانیوں، بھارتی مظالم کے حقائق کو اجاگر کیا جائے گا۔
یوم استحصال کی مناسبت سے نغمہ جاری
یوم استحصال کی مناسبت سے خصوصی نغمہ بھی جاری کیا گیا ہے، جس کا مقصد کشمیریوں کی آواز دنیا تک پہنچانا ہے، اس نغمے کے بول درج ذیل ہیں۔
ہم جنم جنم رسوا جو ہوئے
ہم روز روز جو خون ہوئے
لوٹے بھی گئے مسلے بھی گئے
دربار حکم گونجے بھی گئے
اٹھے گی اب یہ وادی
لے کر رہیں گے آزادی
