پاکستان 32 برس بعد اولمپکس میڈل سے ایک قدم کی دوری پر ہے۔ اولمپکس میڈل کی پہلی اور آخری امید ارشد ندیم نے پیرس اولمپکس 2024 میں جیولین تھرو کے فائنل مقابلے کے لیے کوالیفائی کرلیا ہے۔ فائنل مقابلہ 8 اگست کی رات 11 بج کر 25 منٹ پر ہوگا۔
بھارت کے نیرج چوپڑا 89.34 میٹر تھرو کی اور وہ پہلے نمبر پر رہے۔ گرینیڈا کے اینڈرسن پیٹرس 88.63 میٹر کی تھرو کے ساتھ دوسرے نمبر پر رہے۔ پاکستان کے ارشد ندیم 86.59 میٹر کی تھرو پھینک کر تیسرے نمبر پر رہے۔
8 اگست کو فائنل مقابلے میں کیا ہوگا؟
پیرس اولمپکس منتظمین نے جیولین تھرو مقابلوں کے لیے 32 پلیئرز کو 2 گروپس میں تقسیم کیا تھا۔ دونوں گروپس سے ٹاپ 6 پلیئرز فائنل کھیلیں گے۔ ارشد ندیم اور نیرج چوپڑا ایک ہی گروپ بی میں شامل ہیں۔ عالمی نمبر 5 ایڈیس میٹوشیویسیئس اور عالمی نمبر 6 اینڈرسن پیٹرس بھی اس گروپ میں شامل ہیں۔ 90 میٹر کی تھرو کرنے والے جرمنی کے میکس ڈینھنگ بھی گروپ بی کا حصہ ہیں۔
مزید پڑھیں:پیرس اولمپکس 2024: ارشد ندیم نے جیولین تھرو فائنل کے لیے کوالیفائی کرلیا
اولمپکس منتظمین نے فائنل میڈل راؤنڈ کے لیے کوالیفیکیشن معیار کو بڑھا دیا ہے۔ اس بار کم سے کم 84 میٹر کی تھرو کرنے والے پلیئر کی میڈل راؤنڈ میں رسائی کی حد مقرر تھی۔ فائنل راؤنڈ میں مجموعی 12 پلیئرز نے جگہ بنائی ہے۔ 84 میٹر کی تھرو کرنے والوں کی تعداد 12 سے کم ہونے پر بہترین تھرو والے پلیئرز کو فائنل کھیلنے کا موقع دیا گیا ہے۔
32 برس بعد ارشد ندیم کی شکل میں پاکستان کے لیے میڈل کی امید باقی
یاد رہے کہ پاکستان نے 1992 کے بعد سے اولمپکس میں کوئی بھی میڈل نہیں جیتا، تب پاکستان ہاکی ٹیم نے کانسی کا تمغہ جیتا تھا۔ لگ بھگ 32 برس بعد ارشد ندیم کی شکل میں پاکستان کے لیے میڈل کی امید باقی ہے۔ ارشد ندیم پاکستان کے لیے کامن ویلتھ گیمز میں سونے اور ورلڈ ایتھلیٹکس چیمپیئن شپ میں چاندی کا تمغہ جیت چکے ہیں، یوں وہ پاکستان کی تاریخ کے اب تک کے عظیم ترین ایتھلیٹ بن چکے ہیں۔
مزید پڑھیں:ارشد ندیم بمقابلہ نیرج چوپڑا، کس کا پلڑا بھاری؟
پاکستانی دستے میں شامل 7 میں سے 6 ایتھلیٹس کا سفر پہلے مرحلے ہی میں ختم
یاد رہے کہ اس سے قبل پیرس اولمپکس 2024 میں شوٹنگ کے 25 میٹر ریپڈ پسٹل ایونٹ میں غلام مصطفیٰ بشیر بھی پہلے راؤنڈ سے آگے نہ بڑھ سکے۔ پاکستانی دستے میں شامل 7 میں سے 6 ایتھلیٹس کا سفر پہلے مرحلے ہی میں ختم ہوگیا تھا۔
