پشاور ہائیکورٹ نے صوبائی حکومت کی جانب سے جوڈیشل کمیشن کے لیے ججز کی نامزدگی سے معذرت کرلی ہے۔ ہائیکورٹ انتظامیہ نے صوبائی حکومت کو آگاہ کردیا ہے۔
ذرائع کے مطابق چیف جسٹس پشاور ہائیکورٹ جسٹس اشتیاق ابراہیم کی ہدایت پر رجسٹرار پشاور ہائیکورٹ نے صوبائی حکومت کو مراسلہ ارسال کردیا ہے، جس میں کہا گیا ہے کہ موجودہ صورت حال میں 9 مئی کے واقعات کے لیے جوڈیشل کمیشن تشکیل نہیں دے سکتے۔
مزید پڑھیں:9 مئی کو افواج پاکستان کے اتحاد کے خلاف بغاوت کرائی گئی، بھولنے کا کوئی چانس نہیں، خواجہ آصف
مراسلے کے مطابق صوبائی حکومت نے جوڈیشل کمیشن کی تشکیل کے لیے جو درخواست ارسال کی تھی موجودہ حالات میں اس پر جوڈیشل کمیشن کی تشکیل ممکن نہیں، پشاور ہائیکورٹ نے یہ مؤقف بھی اختیار کیا ہے کہ جس فورم سے یہ درخواست ارسال کی گئی ہے وہ اس کا مجاز نہیں۔
پشاور ہائیکورٹ نے صوبائی حکومت کو بھیجے گئے مراسلے میں کہا ہے کہ صوبائی حکومت نے رولز آف بزنس 1985 کی خلاف ورزی کی ہے، اس صورت میں درخواست پر عمل درآمد نہیں کیا جاسکتا۔
