پاکستانی سپر ہٹ گانے ‘بلاک بسٹر’ نے ریلیز ہوتے ہی جہاں پوری دنیا کے لوگوں کے دل جیت لیے وہیں بالی ووڈ کی معروف اداکارہ شردھا کپور بھی ’بلاک بسٹر‘ جیسے سپر ہٹ پاکستانی گانے کی فین نکلیں۔
شردھا کپور جو ان دنوں اپنی فلم ‘استری 2’ کی پروموشن میں مصروف ہیں، اور مختلف انٹرویوز بھی دیتی نظر آرہی ہیں۔ انہوں نے حال ہی میں ایک انٹرویو میں اپنے پسندیدہ گانے کے حوالے سے بات کرتے ہوئے کہا کہ ان دنوں ایک گانا انہیں بہت پسند آرہا ہے جو ان کی میوزک پلے لِسٹ میں بھی ٹاپ پر ہے، یہ گانا گلوکار فارس شفیع، عمیر بٹ اور گھڑوی گروپ کا ’بلاک بسٹر‘ ہے۔
شردھا کپور نے کہا کہ یہ گانا نہ صرف بہترین ہے بلکہ اس کے بیٹس بھی بےحد کمال کے ہیں، اداکارہ کے پسندیدہ گانے کا نام سُن کر اُن کے ساتھ بیٹھے اداکار راجکمار راؤ نے ‘بلاک بسٹر’ کی دُھن بھی گنگنائی۔
‘بلاک بسٹر’ کے میوزک کمپوزر ذوالفقار جبار خان المعروف ‘زلفی’ نے اپنے آفیشل انسٹاگرام ہینڈل پر شردھا کپور کی ویڈیو پوسٹ کرتے ہوئے کہا کہ انہیں یہ دیکھ کر بہت خوشی ہو رہی ہے کہ فن کی حوصلہ افزائی سرحدوں کی محتاج نہیں۔
View this post on Instagram
زلفی کا مزید کہنا تھا کہ انہیں یہ جان کر بہت اچھا لگا کہ ان کا گانا ‘بلاک بسٹر’ شردھا کپور کی پلے لِسٹ میں ٹاپ پر ہے اور راجکمار راؤ نے جس طرح ‘بلاک بسٹر’ کی دُھن گنگنائی وہ دیکھ کر خوشی محسوس ہوئی۔ ساتھ ہی انہوں نے شردھا کپور کی نئی فلم ’اسٹری ٹو‘ کی کامیابی کے لے نیک خواہشات کا اظہار بھی کیا۔
واضح رہے کہ رواں سال 25 مئی کو ریلیز ہونے والے گانے ‘بلاک بسٹر’ نے یوٹیوب پر 35 ملین سے زائد ویوز حاصل کرلیے ہیں، اس گانے کے گلوکاروں میں فارس شفیع، عمیر بٹ اور گھڑوی گروپ شامل ہیں۔ اور گانے کے بول پنجابی، انگریزی اور اردو پر مشتمل ہیں۔
