ہنزہ گوجال میں فرسٹ قراقرم میراتھن ریس کا انعقاد ہوا جس میں ملک بھر سے 3 سو سے زائد مرد و خواتین نے شرکت کی۔ اختتامی تقریب کے مہمان خصوصی فورس کمانڈر کاشف خلیل اور میرِ محفل معاونِ خصوصی برائے اطلاعات ایمان شاہ تھے۔
اس موقع پر فورس کمانڈر کاشف خلیل، صوبائی وزیر غلام محمد اور معاون خصوصی برائے اطلاعات ایمان شاہ نے نمایاں پوزیشن حاصل کرنے والے ایتھلیٹس میں انعامات بھی تقسیم کیے جبکہ حسینی گوجال کے عمائدین نے اپنا سپاسنامہ بھی پیش کیا۔
فورس کمانڈر کاشف خلیل نے اپنے خطاب میں کہا کہ گلگت بلتستان خوبصورت علاقہ ہے، یہاں کے لوگ بڑے مہمان نواز ہیں۔ انہوں نے کہا کہ گلگت بلتستان اور ہنزہ میں سیاحت کے فروغ کے لیے اس قسم کےایونٹ منعقد ہونے چاہئیں تاکہ یہ علاقہ پروموٹ ہوسکے۔
تقریب میں ملکی اور غیر ملکی سیاحوں اور ایتھلیٹس نے بھی میرا تھن ریس میں شرکت کی۔ انہوں نے گلگت بلتستان اور ہنزہ کو دنیا کا خوبصورت علاقہ قرار دیا۔
