کراچی میں تعینات چینی قونصل جنرل یانگ ینگڈونگ نے کوئٹہ میں گورنر بلوچستان جعفرخان مندوخیل سے ملاقات میں خطے میں رونما ہونے والی سیاسی و معاشی تبدیلیوں سمیت صوبے میں صحت کی سہولیات اور طلبا کے لیے اسکالرشپ سمیت باہمی دلچسپی کے امور پر تبادلہ خیال کیا ہے۔
یہ بھی پڑھیں: مخالفین کا ایجنڈا ناکام، چین کے اعلیٰ سطح کے وفد کا گوادر کا دورہ
بلوچستان حکومت کے اعلامیہ کے مطابق گورنر بلوچستان نے اس موقع پر گفتگو کرتے ہوئے کہا کہ چین ہمارا آزمودہ دوست ہیں جس نے تاریخ کے مختلف مراحل میں پاکستان کا ساتھ نبھایا ہے، سی پیک جیسے میگا پروجیکٹ کا ایک اہم لنک بلوچستان ہے اور گوادر سی پیک کے تاج پر چمکتا ہوا نگینہ ہے۔
گورنر بلوچستان جعفر خان مندوخیل کا کہنا تھا کہ چائنا پاکستان اقتصادی راہداری کی تکمیل سے پاکستان بالخصوص بلوچستان تمام معاشی سرگرمیوں کا مرکز بنے گا، بلوچستان میں سرمایہ کاری کے دستیاب منافع بخش موقعوں سے استفادہ کرنے کی اشد ضرورت ہے۔
مزید پڑھیں: گوادر: عمان سے پاکستان تک
گورنر بلوچستان کا کہنا تھا کہ دونوں ممالک کے مسقبل کے پیش نظر ہمیں اپنی نئی نسل کو جدید تعلیم کے ساتھ جدید مہارتیں بھی سکھانے ہوں گے، چینی قونصل جنرل کی جانب سے گورنر بلوچستان کو چین کے دورے کی باقاعدہ دعوت دی گئی، دونوں رہنماؤں نے مختلف شعبوں میں معاونت جاری رکھنے پر اتفاق کیا۔
