صدر آصف زرداری کی روسی صدر ولادیمیر پیوٹن سے ترمانستان میں ایک غیر رسمی ملاقات ہوئی ہے جس میں دونوں رہنماؤں کے درمیان خوشگور جملوں کا تبادلہ ہوا۔
یہ سائیڈ لائن ملاقات ترکمانستان کے شہر اشک آباد میں بین الاقوامی فورم کے موقعے پر ہوئی۔
یہ بھی پڑھیں: پاکستان اور ترکمانستان کے درمیان بہترین تعلقات ہیں، صدر آصف زرداری
دونوں صدور نے دو طرفہ تعلقات مزید مضبوط بنانے کی ضرورت پر زور دیتے ہوئے ایک دوسرے کے لیے نیک خواہشات کا اظہار کیا۔ دونوں کے درمیان خوشگوار جملوں کا بھی تبادلہ ہوا۔
اس موقعے پر دوران نائب وزیراعظم اور وزیر خارجہ سینیٹر محمد اسحاق ڈار بھی موجود تھے۔
قبل ازیں صدر مملکت سے ترکیہ کی پارلیمنٹ کے اسپیکر نعمان قرطولمس نے جمعہ کو بین الاقوامی فورم ’وقت اور تہذیبوں کا باہمی تعلق: امن و ترقی کی بنیاد‘ کے موقعے پر ملاقات کی۔
ایوان صدر کے پریس ونگ سے جاری بیان کے مطابق ملاقات کے دوران نائب وزیراعظم اور وزیر خارجہ سینیٹر محمد اسحاق ڈار اور وزیراعلیٰ بلوچستان میر سرفراز احمد بگٹی بھی موجود تھے۔
صدر مملکت نے پاکستان اور ترکیہ کے درمیان ریل روابط بہتر بنانے کی ضرورت پر زور دیتے ہوئے کہا کہ دونوں ممالک کے درمیان تجارتی اور اقتصادی تعاون، عوامی رابطوں کو فروغ دینا ہوگا۔
انہوں نے دونوں برادر ممالک کو مزید قریب لانے کے لیے دو طرفہ تعلقات مزید بہتر بنانے اور وفود کے تبادلوں پر زور دیا اور کہا کہ ترکیہ پاکستان اور مسلم دنیا کا عظیم اور مخلص دوست ہے۔ صدر مملکت نے کہا کہ ترکیہ مسلم امہ کو درپیش مسائل پر اصولی موقف اختیار کرتا اور ناانصافی کے خلاف آواز اٹھاتا آیا ہے۔
ملاقات میں فلسطین اور لبنان کی سنگین انسانی صورتحال پر تشویش کا اظہار کیا گیا۔ ملاقات میں امت مسلمہ کو درپیش چیلنجز سے نمٹنے کے لیے مسلم دنیا کی جانب سے مخلصانہ اور سنجیدہ کوششیں کرنے کی ضرورت پر بھی زور دیا گیا۔
صدر مملکت نے کہا کہ ترکیہ ایک اقتصادی طاقت بننے کے راستے پر گامزن ہے۔ انہوں نے اس موقع پر ترکیہ کی کامیابی اور خوشحالی کے لیے نیک خواہشات کا اظہار کیا۔
