15 اور 16 اکتوبر کو اسلام آباد میں شنگھائی تعاون تنظیم کا اجلاس ہونے جا رہا ہے۔ جس میں غیر ملکی وفود سمیت کچھ ممالک کے وزرائے اعظم کی شرکت بھی متوقع ہے۔ جس کے باعث اسلام آباد انتظامیہ کی جانب سے شہر میں سخت سیکیورٹی کے انتظامات کیے گئے ہیں۔
دوسری جانب پاکستان تحریک انصاف (پی ٹی آئی) نے 15 اکتوبر کو اسلام آباد کے ڈی چوک میں احتجاج کی کال دی ہے۔ جبکہ پاکستان تحریک انصاف کی سیاسی کمیٹی کے اجلاس میں مرکز سے نچلی سطح تک تمام تنظیمی ذمہ داران اور ونگز کو ڈی چوک احتجاج کی تیاریوں کو حتمی شکل دینے کی بھی ہدایت کردی گئی ہے۔
مزید پڑھیں:ایس سی او اجلاس، سفارتکاروں کو ڈپلومیٹک انکلیو میں رہنے کی ہدایت
واضح رہے کہ اسلام آباد انتظامیہ کی جانب سے ایس سی او کانفرنس کے متعلق تمام تر سیکیورٹی انتظامات کے پلان سمیت ٹریفک پلان بھی جاری کر دیا گیا تھا۔ چونکہ پاکستان تحریک انصاف کی جانب سے 15 اکتوبر کو احتجاج کی کال بعد میں دی گئی۔ اگر پی ٹی آئی احتجاج کرتی ہے تو فول پروف سیکیورٹی کے لیے پولیس کا پلان بی کیا ہوگا۔
اس حوالے سے بات کرتے ہوئے پولیس ذرائع نے وی نیوز کو بتایا کہ راستوں کو بند کرنا شروع کر دیا گیا ہے۔ جبکہ فی الحال تو یہی طے کیا گیا ہے۔ کہ سیکیورٹی پلان یا ٹریفک پلان میں کسی قسم کی تبدیلی نہیں کی جائے گی۔ اور اگر کچھ تبدیلی ہوئی بھی تو ابھی وقت ہے 15 تاریخ میں۔ حالات کے مطابق پلان میں تبدیلیاں لائی جا سکتی ہیں۔ لیکن ابھی تک کوئی ایسا فیصلہ سامنے نہیں آیا۔
مزید پڑھیں:ایس سی او کانفرنس کے موقع پر پی ٹی آئی کا ڈی چوک میں احتجاج کا اعلان سازش ہے، فیصل کریم کنڈی
یاد رہے کہ اس سے قبل اسلام آباد پولیس کی جانب سے شنگھائی تعاون تنظیم کے اجلاس کے دوران ٹریفک روٹس جاری کیا گیا تھا۔ جی ٹی روڈ پشاور سے روات جانے والے روٹس ٹیکسلا، موٹر وے ، چکری انٹر چینج، چک بیلی روڈ، روات یہ تمام روٹس کھلے ہوں گے۔ اس کے علاوہ مارگلہ روڈ سے راولپنڈی جانے والے افراد نائنتھ ایونیو استعمال کریں۔
اس کے علاوہ فیصل ایونیو سے زیرو پوائنٹ جانے والی ٹریفک نائنتھ ایونیو کی طرف موڑ دی جائے گی۔ بھارہ کہو سے راولپنڈی جانے والے حضرات کورنگ روڈ ، بنی گالہ سے لہتراڑ روڈ استعمال کریں۔ راولپنڈی سے اسلام آباد آنیوالے صدر مری روڈ سے نائنتھ ایونیو استعمال کریں۔ زیر و پوائنٹ فیصل ایونیو سے کورال چوک تک ایکسپریس وے آنے جانے والی تمام ٹریفک کے لیے بند ہو گی۔
مزید پڑھیں: ایس سی او اجلاس: میٹرو بس سروسز کب سے اور کتنے روز کے لیے بند رہیں گی؟
کرنل شیر خان شہید روڈ سے فیض آباد آنے والے حضرات نائنتھ ایونیو سگنل سے اسٹیڈیم روڈ استعمال کریں۔ پشاور سے لاہور جانیوالی ہیوی ٹریفک براستہ ٹیکسلا، موٹر وے اور ترنول پھاٹک سے فتح جنگ روڈ انٹر چینج، موٹر وے استعمال کریں اور لاہور جی ٹی روڈ سے اسلام آباد اور راولپنڈی جانیوالی ہیوی ٹریفک چک بیلی روڈ سے چکری انٹر چینج، موٹر وے استعمال کریں۔
