بھارت کے شہر حیدر آباد میں کھیلے جانے والے تیسرے ٹی20 انٹرنیشنل میچ میں بھارت نے بنگلہ دیش کو 133 رنز سے شکست دیدی۔ بھارت نے پہلے بیٹنگ کرتے ہوئے مقررہ 20 اوورز میں 297 رنز اسکور کیے، میزبان ٹیم کی جانب سے اوپننگ بلے باز سنجو سیمسن نے سنچری اسکور کی۔ انہوں نے 8 چھکوں اور 11 چوکوں کی مدد سے 47 گیندوں پر 111 رنز بنائے۔
بھارتی کپتان سوریا کمار یادیو اور ہارڈک پانڈیا نے شاندار بلے بازی کرتے ہوئے بالترتیب 75 اور 47 رنز بنائے۔ جواب میں بنگلہ دیشی ٹیم مقررہ اوورز میں 7 وکٹوں کے نقصان پر 164 رنز بنا سکی، بھارت کی جانب سے روی بشنوئی نے 3 کھلاڑیوں کو پویلین کی راہ دکھائی۔ بنگلہ دیش کی جانب سے اپنا آخری ٹی20 انٹرنیشنل میچ کھیلنے والے محمود اللہ نے 8 رنز اسکور کیے اور ایک وکٹ حاصل کی۔
مزید پڑھیں:پاکستان میں بھارت کی نسبت کئی گنا زیادہ محبت ملی، ڈاکٹر ذاکر نائیک
میچ میں فتح کے ساتھ بھارت نے 3 میچز کی سیریز 0-3 سے اپنے نام کرلی، سنجو سیمسن کو سینچری اسکور کرنے پر میچ کا بہترین جبکہ سیریز میں بہترین کارکردگی کا مظاہرہ کرنے پر آل راؤنڈر ہارڈک پانڈیا کو مین آف دی سیریز کے ایوارڈ سے نوازا گیا۔
بھارت نے میچ میں مجموعی طور پر ایک ٹی20 اننگ میں سب سے زیادہ 25 چوکے اور 18 اوورز تک 10 رنز یا اس سے زائد کی اوسط سے اسکور کرنے کا ریکارڈ بھی قائم کیا۔ یاد رہےکہ ٹی20 میں سب سے زیادہ 314 رنز بنانےکا ریکارڈ نیپال کے پاس ہے جو اس نے گزشتہ سال ایشین گیمز میں منگولیا کے خلاف بنائے تھے۔
