پاکستان کرکٹ بورڈ (پی سی بی) نے ڈائریکٹر انٹرنیشنل کرکٹ عثمان واہلہ کو تبدیل کرنے کا فیصلہ کیا ہے۔ انتظامیہ عثمان واہلہ سے ناراض ہے، اب اس عہدے کے لیے سابق کرکٹر کی تقرری کی جائے گی۔ ڈاکٹر نعمان نیاز نے دعویٰ کیا ہے کہ کرکٹر شعیب ملک عثمان واہلہ کی جگہ لینے کی کوشش کر رہے ہیں۔
سابق کپتان راشد لطیف کے یوٹیوب چینل (Caught behind) پر میزبان سے گفتگو میں ڈاکٹر نعمان نیاز نے بتایا کہ کرکٹر شعیب ملک، ڈائریکٹر انٹرنیشنل کرکٹ عثمان واہلہ کی جگہ لینے کی کوشش کر رہے ہیں۔
واضح رہے کہ چند دن قبل سابق فاسٹ بولر اور پی سی بی کنسلٹنٹ وہاب ریاض اور ڈائریکٹر انٹرنیشنل کرکٹ عثمان واہلہ کے درمیان سوشل میڈیا پر نوک جھوک ہوئی تھی، جب آل راؤنڈ اسامہ میر کے این او سی پر عثمان واہلہ اور وہاب ریاض نے ایک دوسرے پر لفظی وار شروع کیے تھے۔
مزید پڑھیں:’قومی ٹیم کی کامیابی کے سوا کچھ نہیں چاہتا‘، وہاب ریاض کا نیا بیان سامنے آگیا
وہاب ریاض نے اسامہ میر کو اجازت نامہ (این او سی) نہ دینے پر عثمان واہلہ کو کھری کھری سنائی تھیں کہ اسامہ میر نے این او سی کے لیے متعدد بار عثمان واہلہ سے رابطہ کیا تاہم عثمان واہلہ نے اسامہ میر کی درخواست کو نظر انداز کیا۔
عثمان واہلہ نے سابق فاسٹ بولر وہاب ریاض کے الزامات کی تردید کرتے ہوئے کہا تھا کہ اسامہ میر سے اس حوالے سے بات ہوئی اور وہ یکطرفہ الزامات کی تردید کرتے ہیں۔
عثمان واہلہ کے جواب پر وہاب ریاض نے عثمان واہلہ کو سب کچھ سامنے لانے کی دھمکی دیتے ہوئے لکھا کہ تمام اسکرین شاٹس اور ای میلز جھوٹ نہیں بولتے ہیں تمام اسٹوری بتاؤں گا۔ میرے پاس کہنے کو بہت کچھ ہے، صرف اسی سوال کا جواب دیا جو پوچھا گیا تھا اور اگر کوئی اس کی تردید کرتا ہے تو میں تمام ثبوت انہیں فراہم کردوں گا۔
