مسجد نبوی کی چھتریاں جدید فنِ تعمیر کا ایک حیرت انگیز نمونہ ہیں جو زائرین اور نمازیوں کی سہولت کے لیے خصوصی طور پر تیار کی گئی ہیں۔ یہ چھتریاں موسم کی سختیوں سے بچاؤ کے ساتھ ساتھ عبادت کا پرسکون ماحول فراہم کرتی ہیں، خاص طور پر گرمی کے موسم میں جب درجہ حرارت بہت زیادہ ہو جاتا ہے۔
ان چھتریوں کی تعداد 250 ہے، جو مسجد کے مشرقی، مغربی اور شمالی صحنوں میں نصب ہیں۔ ہر چھتری کا سائز 25.5 میٹر لمبا اور چوڑا ہے، اور جب یہ مکمل طور پر کھلتی ہیں تو یہ مجموعی طور پر 143,000 مربع میٹر رقبے کو ڈھانپ لیتی ہیں، جس سے 2 لاکھ سے زائد افراد کو عبادت کے لیے سایہ اور سہولت فراہم ہوتی ہے۔
یہ بھی پڑھیں: سعودی عرب نے پہلا بین الاقوامی ڈیجیٹل پرس لانچ کردیا
یہ چھتریاں نہ صرف جمالیاتی حسن کا مظہر ہیں بلکہ ان میں جدید ٹیکنالوجی کا بھی بھرپور استعمال کیا گیا ہے۔ انہیں خاص قسم کے کپڑے سے تیار کیا گیا ہے جو دھوپ کی بالائے بنفشی شعاعوں کو منعکس کرتے ہوئے ہوا کو گزرنے دیتا ہے، جس سے سایہ بھی ٹھنڈا اور آرام دہ رہتا ہے۔ بارش اور تیز ہواؤں کے مقابلے کے لیے بھی یہ چھتریاں مضبوطی سے تیار کی گئی ہیں۔
چھتریوں کا نظام مکمل طور پر خودکار ہے اور یہ نماز کے اوقات اور موسم کی صورتحال کے مطابق کھلتی اور بند ہوتی ہیں۔ ہر چھتری صرف 3 منٹ میں کھل یا بند ہو جاتی ہے، جس سے یہ نظام نہایت مؤثر اور وقت کی بچت کرنے والا ثابت ہوا ہے۔
مزید پڑھیں: مسجد قبا میں 19 ملین سے زیادہ زائرین کی آمد، جدید سہولیات کا اہتمام
رات کے وقت یہ چھتریاں خاص روشنیوں سے منور کی جاتی ہیں جو ماحول کی خوبصورتی میں اضافہ کرتی ہیں بلکہ نمازیوں کے لیے مناسب روشنی کا انتظام بھی کرتی ہیں۔
گرمی کے موسم میں درجہ حرارت کم کرنے کے لیے ان چھتریوں کے ساتھ دھند کے اسپرے کا نظام بھی منسلک ہے، جو ہوا میں نمی شامل کرکے ماحول کو خوشگوار بناتا ہے۔ یہ نظام درجہ حرارت کو 8 ڈگری سینٹی گریڈ تک کم کرنے میں مدد دیتا ہے، جس سے نمازیوں کو گرمی سے نجات ملتی ہے۔
مزید پڑھیں: سعودی عرب میں سیاحت کے شعبہ نے نئے ریکارڈ قائم کردیے
چھتریوں کی دیکھ بھال کے لیے ماہر انجینئرز اور تکنیکی عملہ ہمہ وقت مستعد رہتا ہے تاکہ یہ نظام ہمیشہ بہترین حالت میں کام کرتا رہے۔ باقاعدہ مرمت اور جائزے کے ذریعے اس بات کو یقینی بنایا جاتا ہے کہ زائرین کو کسی بھی وقت کوئی دشواری پیش نہ آئے۔
یہ چھتریاں مسجد نبوی کے ترقیاتی منصوبوں کا ایک حصہ ہیں، جو زائرین اور نمازیوں کو بہترین سہولیات فراہم کرنے کے عزم کی عکاس ہیں۔ ان چھتریوں کی موجودگی اس بات کی گواہی دیتی ہے کہ سعودی حکومت حرمین شریفین کی خدمت کے لیے کتنی پرعزم ہے، اور اہل مدینہ اور دنیا بھر سے آئے زائرین کو ہر ممکن آرام فراہم کرنے میں کوئی کسر نہیں چھوڑی گئی ہے۔
