مسلم لیگ ن کے صدر اور سابق وزیراعظم نواز شریف نے کہا ہےکہ انہوں نے پنجاب حکومت کی جانب سے پی آئی اے کی خریداری پر غور کی جو بات کی اس پر مزید کام کا ارادہ ہے۔ ا گر ایسا ہو جائے تو ملک کو ایک اچھی ایئر لائن میسر آئےگی۔
امریکا سے لندن واپس پہنچنے پر میڈیا سے گفتگو میں نواز شریف کا کہنا تھا کہ مرکز اور پنجاب میں اچھا کام ہو رہا ہے، پاکستان ٹریک پر واپس آرہا ہے، معاشی اشاریے بہتر ہو رہے ہیں۔ مریم نواز پنجاب میں اچھا کام کر رہی ہیں، مریم کو دن رات ایک فکر ہے کہ غریب آسانی سے زندگی گزار سکیں۔
مزید پڑھیں:ایئر پنجاب، مریم نواز کی تجویز پر نواز شریف کی بھی حمایت
صدر مسلم لیگ ن میاں نواز شریف امریکا سے لندن واپس پہنچے تو لیگی کارکنان کی بڑی تعداد نے ان کا ایون فیلڈ ہاؤس کے باہر استقبال کیا۔
صدر مسلم لیگ ن @NawazSharifMNS امریکہ سے لندن پہنچ گئے لیگی کارکنان نے ایون فیلڈ ہاوس کے باہر استقبال کیا pic.twitter.com/5S0vDwAAaj
— Azhar Javaid (@azharjavaiduk) November 2, 2024
واضح رہےکہ نواز شریف نے امریکا میں کہا تھا کہ وزیراعلیٰ پنجاب مریم نواز پی آئی اے کی خریداری سے متعلق غور کر رہی ہیں، مریم نواز نے اس سلسلے میں اُن سے صلاح مشورہ بھی کیا ہے، مریم نےکہا ہے کہ اُس ایئر لائن کا نام ایئر پنجاب رکھا جاسکتا ہے۔
نواز شریف کا کہنا تھا کہ انہوں نے مریم نواز سےکہا تھا کہ آپ پی آئی اے کو خرید بھی سکتی ہیں اور نئی ائیرلائن بھی بنا سکتی ہیں۔ پی آئی اے کو پی ٹی آئی دور میں تباہ کیا گیا، پی آئی اے کے پائلٹس کو جعلی کہنے والا پی ٹی آئی دور کا وزیر آج چھپا بیٹھا ہے۔
