گورنر سندھ کامران ٹیسوری نے امریکا کو اپنا 47واں صدر منتخب کرنے پر مبارکباد دیتے ہوئے کہا ہے کہ سابق امریکی صدر کی وہائٹ ہاؤس واپسی انہیں اور امریکا کو مبارک ہو، اسی طرح پاکستانیوں کو پاکستان اور اپنے لوگ مبارک ہوں۔
یہ بھی پڑھیں:ٹرمپ کے عمران خان سے اچھے تعلقات، ان کے امریکی صدر بننے سے فرق تو پڑے گا، پاکستان تحریک انصاف
پاکستان میں ری پبلیکن امیدوار ڈونلڈ ٹرمپ کی تاریخی کامیابی پر بعض حلقوں کی جانب سے اظہارِ مسرت پر تبصرہ کرتے ہوئے گورنر سندھ کا کہنا تھا کہ بیگانے کی شادی میں عبداللہ دیوانہ کی مثال سنی تھی، اب دیکھ بھی لی۔
گورنر سندھ کا کہنا تھا کہ ٹرمپ کی جیت کا پاکستان میں جشن منانے والے خوش فہمی میں نہ رہیں، خواہ مخواہ دیوانہ ہونے والوں کو دیکھ کر افسوس ہوا اور ترس بھی آیا۔
مزید پڑھیں:امریکی انتخابات میں ڈونلڈ ٹرمپ کی جیت، نواز شریف کا تبصرے سے گریز
کامران ٹیسوری کا کہنا تھا کہ خدا کرے ٹرمپ امریکی معیشت بہتر بناتے ہوئے دنیا میں امن لائیں، ان کی فتح پر پاکستان میں مٹھائیاں بانٹنے والوں کا منہ کڑوا ہی رہے گا، ٹرمپ کی جیت پرڈھول بجانے والے پاکستانیوں کا مقدر صرف تھکان ہی ہے۔
