بھارتی وزیر اعظم نریندر مودی نے مقبوضہ کشمیر کی جزوی خودمختاری ختم کرنے کے 2019 کے متنازع فیصلے کی بھرپور حمایت کرتے ہوئے مقبوضہ کشمیر اسمبلی کے مطالبے کو مسترد کر دیا ہے۔
یہ بھی پڑھیں:دفعہ 370 کی بحالی، مقبوضہ کشمیر اسمبلی نے بڑا فیصلہ کرلیا
جمعہ کو مغربی ریاست مہاراشٹر میں ایک ریاستی انتخابی ریلی سے خطاب کر تے ہوئے نریندر مودی نے کہا کہ کشمیر میں صرف بابا صاحب امبیڈکر کا آئین ہی چلے گا۔ دنیا کی کوئی طاقت کشمیر میں آرٹیکل 370 (جزوی خودمختاری) کو بحال نہیں کر سکتی۔
نریندر مودی کی بھارتیا جنتا پارٹی (بی جے پی) حکومت نے 2019 میں کشمیر کی جزوی خودمختاری ختم کردی تھی اور ریاست کو وفاق کے زیر انتظام 2 علاقوں جموں کشمیر اور لداخ میں تقسیم کردیا تھا۔
مزید پڑھیں:کشمیریوں اور فلسطینیوں کے حالات بہت کچھ کرنے کی طرف توجہ دلاتے ہیں، آرمی چیف جنرل عاصم منیر
مقبوضہ کشمیر میں ستمبر اور اکتوبر میں ایک دہائی بعد پہلے مقامی انتخابات ہوئے جن میں نو منتخب قانون سازوں نے رواں ہفتے ایک قرارداد منظور کی تھی جس میں کشمیر کے اسٹیٹس کو بحال کرنے کا مطالبہ کیا تھا۔
کشمیر کی حکمراں نیشنل کانفرنس پارٹی نے اپنے انتخابی منشور میں وعدہ کیا تھا کہ وہ کشمیر کی جزوی خودمختاری والے قانون کو بحال کرے گی لیکن ترمیم کے بعد ایسا کرنے کا اختیار مودی کی وفاقی حکومت کے پاس ہے۔
یہ بھی پڑھیں:مقبوضہ کشمیر اسمبلی میں آرٹیکل 370 کی منسوخی کیخلاف قرارداد کی منظوری سے کیا اثر پڑے گا؟
بھارت کے نام نہاد آئین کے مطابق مقبوضہ کشمیر کے نئے قانون ساز سوائے امن عامہ اور پولیسنگ کے معاملات کے دیگر بھارتی ریاستوں کی طرح مقامی مسائل پر قانون سازی کر سکتے ہیں۔ انہیں ان تمام پالیسی فیصلوں پر بھی وفاقی طور پر مقرر کردہ ایڈمنسٹریٹر کی منظوری کی بھی ضرورت ہوگی۔
جزوی خود مختاری کے ایکٹ کے تحت مقبوضہ کشمیر کا اپنا آئین تھا اور خارجہ امور، دفاع اور مواصلات کے علاوہ تمام معاملات پر قوانین بنانے کی آزادی تھی۔
مزید پڑھیں آزاد کشمیر کا مقبوضہ کشمیر سے موازنہ کرنے والوں کے لیے سوچنے کا مقام ہے، وزیراعظم چوہدری انوارالحق
مقبوضہ کشمیر جہاں حریت پسند 1989 سے سیکیورٹی فورسز سے لڑ رہے ہیں، بھارت کا واحد مسلم اکثریتی علاقہ ہے۔ 1947 میں برطانوی نوآبادیاتی حکمرانی سے آزادی حاصل کرنے کے بعد سے یہ پاکستان اور بھارت کے درمیان علاقائی تنازعات کا واحد مرکز رہا ہے۔
کشمیر ایک مکمل خطہ ہے، جسے تقسیم ہند کے فارمولے کے تحت مسلم اکثریتی علاقہ ہونے کے ناطے پاکستان کے ساتھ شامل کیا جانا تھا، لیکن بھارت نے اس کی خلاف ورزی کرتے ہوئے اپنی فوجیں کشمیر میں اتار کر اس پر جبراً قبضہ کر لیا تھا، تب سے بھارت کے زیر قبضہ مقبوضہ جموں کشمیر اور آزاد کشمیر میں جزوی خود مختار حکومتیں قائم تھیں، لیکن 2019 میں بھارت نے عالمی قوانین کی خلاف ورزی کرتے ہوئے مقبوضہ کشمیر کی جزوی خودمختاری بھی ختم کر دی تھی۔
