گلگت بلتستان کے علاقے استور سے راولپنڈی جانے والی باراتیوں کی کوسٹر کو حادثہ پیش آیا ہے اور دریا میں گرگئی ہے، جس میں 25 افراد سوار تھے۔
ریسکیو آپریشن کے دوران اب تک 12 افراد کی لاشیں نکال لی گئی ہیں، جبکہ زندہ بچ جانے والی دلہن کو زخمی حالت میں اسپتال منتقل کیا گیا ہے جہاں پر اسے طبی امداد دی جارہی ہے۔ کوسٹر استور کے علاقے پریشنگ سے بارات لے کر چکوال جا رہی تھی۔
یہ بھی پڑھیں گلگت بلتستان سے راولپنڈی آنے والی مسافر بس کو حادثہ، 3 افراد جاں بحق، متعدد زخمی
حادثے کے باعث قریب ترین اسپتال اور گلگت سب ڈویژن جگلوٹ میں سول اسپتال کے عملے کو الرٹ رہنے کی ہدایات دی گئی ہیں۔
گلگت بلتستان حکومت کے ترجمان نے میڈیا کو بتایا کہ راولپنڈی جانے والی باراتیوں کی کوسٹر کو تھلیچی پل کے قریب حادثہ پیش آیا اور دریا میں جاگری۔
انہوں نے بتایا کہ اب تک 12 افراد کی لاشیں نکال لی گئی ہیں جبکہ دیگر کی تلاش جاری ہے، زخمی حالت میں ملنے والی دلہن کو قریبی اسپتال میں طبی امداد دی جارہی ہے۔
حادثے کے مقام پر موجود عینی شاہدین نے بتایا کہ کوسٹر تیز رفتاری کے باعث موڑ کاٹتے ہوئے پھسل کر کھائی میں جا گری۔
ایک ریسکیو اہلکار نے بتایا کہ حادثے کی اطلاع ملتے ہی ہم جائے وقوعہ پر پہنچ گئے تھے، تاہم یہاں کے دشوار گزار راستے اور کھائی کی گہرائی کی وجہ سے امدادی کارروائیوں میں مشکلات پیش آ رہی ہیں، لیکن ہم لاپتا افراد کی تلاش اور زخمیوں کو فوری طبی امداد فراہم کرنے میں مصروف ہیں۔
دوسری جانب وزیراعلیٰ گلگت بلتستان حاجی گلبر نے باراتیوں کی بس کو پیش آنے والے حادثے پر دکھ اور افسوس کا اظہار کرتے ہوئے ہدایات دی ہیں کہ ریسکیو آپریشن تیز کیا جائے۔
ریسکیو ورکرز کی جانب سے لاشوں کی تلاش کے لیے آپریشن جاری ہے، اور جائے حادثہ پر ڈپٹی کمشنر دیامر سمیت دیگر حکام بھی موجود ہیں۔
یہ بھی پڑھیں راولپنڈی سے گلگت جانے والی بس کو حادثہ، 3 مسافر جاں بحق
حادثے کی خبر سن کر علاقے میں کہرام مچ گیا ہے اور متاثرہ خاندانوں کے افراد غم میں مبتلا ہیں۔
