سیکیورٹی اداروں کی جانب سے جناح انٹرنیشنل ایئرپورٹ کراچی اور اس سے ملحقہ علاقوں کو ریڈ زون قرار دے دیا گیا ہے۔ جناح انٹرنیشنل ایئر پورٹ پر کسی بھی غیر قانونی سرگرمی کی روک تھام اور مشکوک افراد کے داخلے کو روکنے کے لیے پولیس نے اضافی چیک پوسٹیں بھی قائم کی ہیں۔
ترجمان ضلع ملیر پولیس کراچی کے مطابق ایئرپورٹ سے بذریعہ اندرون اور بیرون ملک روانہ ہونے والے مسافر چیک پوسٹوں سے مکمل کلیئرنس کے بعد ہی ائیر پورٹ کی حدود میں داخل ہو سکیں گے۔ اضافی چیک پوسٹس اسٹار گیٹ، سی اے اے کلب روڈ، مادام بریج، ماڈل موڑ اور اے ایس ایف روڈ چوکی پر قائم کی گئی ہیں۔
مزید پڑھیں: پاکستان میں چینی شہریوں پر حملوں کی تاریخ، اب تک کتنے چینی ہلاک ہو چکے ہیں؟
اضافی چیک پوسٹوں پر پولیس اور رینجرز شہریوں اور مسافروں کو مشترکہ طور پر چیک کریں گے۔ حفاظتی اقدامات کسی بھی ممکنہ خطرے کی روک تھام، شہریوں اور مسافروں کی جان و مال کی حفاظت کے لیے کیے جا رہے ہیں۔
سیکیورٹی اداروں کی جانب سے بذریعہ ائیر پورٹ اندرون اور بیرون ملک روانہ ہونے والے مسافروں اور ان کے ہمرہ آنے والے شہریوں سے درخواست کی گئی ہے کے وہ اپنے شناختی کارڈ اور ٹکٹ ساتھ رکھیں۔ ریڈ زون میں غیر ضروی داخلے پر پابندی عائد کی گئی ہے۔ کسی بھی پریشانی سے بچنے کے لیے شہریوں کو آمدو رفت کے دیگر راستے استعمال کرنے کی ہدایت کی گئی ہے۔
