پاکستان تحریک انصاف (پی ٹی آئی) کی قیادت نے عمران خان سے درخواست کی ہے کہ 24 نومبر کو احتجاج کی کال واپس لی جائے کیوں کہ زیادہ لوگوں کو اسلام آباد میں جمع کرنا ممکن نہیں۔
میڈیا رپورٹس کے مطابق چیئرمین پی ٹی آئی بیرسٹر گوہر اور وزیراعلیٰ خیبرپختونخوا علی امین گنڈاپور نے آج اڈیالہ جیل میں عمران خان سے ملاقات کی، جہاں پر یہ درخواست کی گئی۔
یہ بھی پڑھیں توشہ خانہ 2 کیس میں ضمانت منظور، عمران خان کی رہائی کا حکم
میڈیا رپورٹس کے مطابق اڈیالہ جیل میں ملاقات کے دوران عمران خان نے علی امین گنڈاپور اور بیرسٹر گوہر کو ہدایت دی کہ آپ مذاکرات کے لیے پہل کریں۔
میڈیا رپورٹس میں کہا گیا ہے کہ بیرسٹر گوہر نے ملاقات کے دوران کہاکہ ہمیں حکومت سے مذاکرات کرنے چاہییں، کیونکہ اگر احتجاج کریں گے تو اس سے ملکی معیشت کو نقصان پہنچنے کا احتمال ہے۔
ملاقات کے دوران بیرسٹر گوہر کا کہنا تھا کہ حکومتوں کی جانب سے جس طرح کریک ڈاؤن کیا جارہا ہے اس صورتحال میں ممکن نہیں کہ زیادہ لوگوں کو اسلام آباد لایا جاسکے۔ اس کے علاوہ موسم سرد ہونے کی وجہ سے بھی ہمیں مشکلات کا سامنا کرنا پڑےگا، کیونکہ زیادہ وقت تک لوگوں کے لیے دھرنے میں بیٹھنا ممکن نہیں ہوگا۔
میڈیا رپورٹس کے مطابق چیئرمین پی ٹی آئی بیرسٹر گوہر نے علی امین گنڈاپور اور عاطف خان کی لڑائی سے متعلق سے عمران خان کو تفصیلات بتائیں۔
میڈیا رپورٹس میں کہا گیا ہے کہ عمران خان نے اسٹیبلشمنٹ سے بات چیت کے لیے علی امین گنڈاپور جبکہ حکومت سے رابطے کرنے کے لیے بیرسٹر گوہر کو ٹاسک سونپ دیا ہے۔
یہ بھی پڑھیں مذاکرات عمران خان کی رہائی سے شروع ہوں گے اور آگے بڑھیں گے، علی امین گنڈاپور نے بڑی شرط رکھ دی
دوسری جانب عمران خان سے ملاقات کے بعد نجی ٹی وی سے گفتگو کرتے ہوئے علی امین گنڈاپور نے کہاکہ مذاکرات عمران خان کی رہائی سے ہی شروع ہوں گے۔
