دیوان فاروق موٹرز لمیٹڈ (ڈی ایف ایم ایل) نے پیداوار کے پہلے 3 ماہ کے اندر اپنے مقامی اسمبلی پلانٹ میں ’ہونری-وی ای‘ (Honri-VE Electric Cars) الیکٹرک وہیکل (ای وی) کے 100 سے زائد یونٹس کامیابی کے ساتھ اسمبل کیے ہیں۔ یہ پاکستان کے الیکٹرک وہیکل سیکٹر میں ایک اہم سنگ میل کی حیثیت رکھتا ہے، کیونکہ ڈی ایف ایم ایل مقامی طور پر الیکٹرک گاڑیاں تیار کرنے میں کلیدی کھلاڑیوں میں سے ایک بن گیا ہے۔
پاکستان اسٹاک ایکسچینج (پی ایس ایکس) کو جاری کردہ ایک حالیہ نوٹیفکیشن میں ڈی ایف ایم ایل نے اعلان کیا ہے کہ 100 ہونری وی یونٹس کی ابتدائی کھیپ ایکو گرین موٹرز لمیٹڈ کو صارفین میں تقسیم کرنے کے لیے فراہم کردی گئی ہے۔ یہ اقدام پاکستان میں الیکٹرک گاڑیوں کی بڑھتی ہوئی طلب اور مقامی طور پر تیار کردہ یونٹس کے ساتھ اس طلب کو پورا کرنے کے لیے کمپنی کے عزم کو اجاگر کرتا ہے۔
مزید پڑھیں: ریگل آٹوموبائلز کو پاکستان میں Seres 3 الیکٹرک کاریں تیار کرنے کی اجازت مل گئی
ہونری وی ایک چینی ساختہ ای وی ہے اور ڈی ایف ایم ایل کے ڈائریکٹر اور کمپنی سیکریٹری محمد حنیف جرمن نے کہا کہ اس گاڑی کا موازنہ سوزوکی کے مقبول ماڈلز جیسے ویگن آر، کلٹس اور مہران سے کیا جاسکتا ہے۔ انہوں نے خاص طور پر ہونیری وی ای کی اندرونی اور بیٹھنے کی گنجائش پر روشنی ڈالتے ہوئے کہا کہ آرام اور جگہ کے لحاظ سے اس کا موازنہ ویگن آر سے کرنا سب سے مناسب ہوگا۔
ہونری-وی ای 2 اقسام میں دستیاب ہے:
ہونری-وی ای 2.0: مکمل چارج پر 200 کلومیٹر کی رینج پیش کرتا ہے، جس کی قیمت 3.99 ملین روپے ہے۔
ہونری-وی ای 3.0: مکمل چارج پر 300 کلومیٹر کی رینج فراہم کرتا ہے، جس کی قیمت 4.99 ملین روپے ہے۔
مزید پڑھیں: منی الیکٹرک کار اب پاکستان میں قسطوں پر دستیاب
اپنی ماحول دوست ٹیکنالوجی اور سستی قیمتوں کے ساتھ، ہونری-وی ای مقامی مارکیٹ میں ایک مضبوط حریف بننے کے لیے تیار ہے، جو روایتی ایندھن پر مبنی کاروں کا سبز متبادل پیش کرتا ہے۔ جیسے جیسے زیادہ گاڑیاں سڑکوں پر آتی ہیں، پاکستان میں برقی نقل و حرکت کی طرف منتقلی تیزی سے بڑھ رہی ہے، ڈی ایف ایم ایل کی مقامی اسمبلی اس تبدیلی میں اہم کردار ادا کر رہی ہے۔
