سینیئر سیاستدان و سابق وفاقی وزیر فیصل واوڈا نے کہا ہے کہ بانی پی ٹی آئی عمران خان کی زندگی کو ان کے حواریوں سے خطرہ ہے، کوشش کریں گے کہ پی ٹی آئی کو پابندی لگنے سے بچایا جائے۔
کراچی میں ایم کیو ایم کے رہنما مصطفیٰ کمال کے ہمراہ میڈیا سے گفتگو کرتے ہوئے انہوں نے کہاکہ عمران خان کو ان کے کیے کی سزا مل رہی ہے۔
یہ بھی پڑھیں عمران خان کی زندگی کو خطرات، اسٹیبلشمنٹ کسی کے ساتھ یا خلاف نہیں، فیصل واوڈا
انہوں نے کہاکہ جب تک ہم ساتھ نہیں بیٹھیں گے پاکستان آگے نہیں بڑھے گا، اختلاف رائے ہوسکتا ہے مگر ہمیں ایک دوسرے کے مینڈیٹ کو تسلیم کرنا ہوگا۔
انہوں نے کہاکہ وزیراعلیٰ خیبرپختونخوا مولا جٹ کی سیاست کررہے ہیں، جو زیادہ دیر نہیں چلے گی، ہم قومی کاز کی خاطر سب پارٹیوں کے پاس جارہے ہیں۔
انہوں نے کہاکہ مصطفیٰ کمال کو بطور میئر دیکھا، ان پر فخر ہے، مہنگائی میں کمی اور اسٹاک مارکیٹ میں تیزی کے لیے سب کی حمایت ضروری ہے۔
انہوں نے کہاکہ کوشش کروں گا کہ ایم کیو ایم کو مناسب نمائندگی ملے، وفاقی حکومت کے ساتھ بھی ایک میٹنگ کی جائےگی۔
فیصل واوڈا نے کہاکہ پاکستان آئے روز دھرنوں اور لاشوں کی سیاست برداشت نہیں کرسکتا۔ عمران خان نے پہلے بھی سول نافرمانی کی تحریک چلائی لیکن اس کے باوجود بنی گالہ کے بل ادا کیے تھے۔ 14 دسمبر کو سول نافرمانی کے غبارے سے بھی ہوا نکل جائےگی۔
انہوں نے کہاکہ عدلیہ سے گزارش ہے جو قانون پارلیمنٹ نے بنادیا اس کا احترام کریں، فوج ہمارا حصہ ہے اور ہم اسے ساتھ لے کر چلیں گے۔
فیصل واوڈا نے کہاکہ رانا ثنااللہ پر جب منشیات کا کیس بنایا گیا تو میں نے مخالفت کی تھی، اسٹیبلشمنٹ کو اچھا برا کہنے سے سیاست اچھی نہیں بلکہ خراب ہوگی۔
فیصل واوڈا ون مین آرمی ہیں، مصطفیٰ کمال
اس موقع پر ایم کیو ایم کے رہنما مصطفیٰ کمال نے کہاکہ فیصل واوڈا نے ایم کیو ایم رہنمائوں سے ملاقات کی، یہ ہمارے اچھے دوست اور بھائی ہیں۔
انہوں نے کہاکہ فیصل واوڈا ون مین آرمی ہیں اور سب جگہ چھائے ہوئے ہیں، پاکستان میں ہر کوئی کہہ رہا ہے میں صحیح اور دوسرا غلط ہے۔
یہ بھی پڑھیں فوج اور پی ٹی آئی کے ایک دوسرے کے خلاف ہونے کا تاثر غلط ہے، فیصل واوڈا
انہوں نے کہاکہ پاکستان میں ہرکوئی دوسرے کو چور اور خود کو صحیح کہہ رہا ہے، سب کو جوڑنے اور ہم آہنگی کا کام بڑی جماعتوں سے نہیں ہوا، یہ کام اب فیصل واوڈا کرہے ہیں۔ ہماری تمام سپورٹ ان کے ساتھ ہے۔
