پاکستان تحریک انصاف (پی ٹی آئی) کے سینیئر رہنما ذلفی بخاری نے امریکا کی جانب سے پاکستان کے بیلسٹک میزائل پروگرام میں مدد فراہم کرنے والی 4 پاکستانی کمپنیوں پر پابندی عائد کرنے کی مخالفت کی ہے۔
سماجی رابطے کی سائٹ ’ایکس‘ پر اپنے ایک بیان میں انہوں نے کہاکہ پاکستان کی جغرافیائی پوزیشن کی وجہ سے یہ ضروری ہے کہ پاکستان اپنی قومی خودمختاری کے تحفظ کے لیے ہمیشہ مناسب اقدامات کرے۔
We strongly oppose the US sanctions on National Development Complex and three commercial entities. Due to Pakistan’s geographical positioning it is imperative that Pakistan always takes the appropriate measures to protect its national sovereignty. It’s unfortunate that even on…
— Sayed Z Bukhari (@sayedzbukhari) December 19, 2024
پی ٹی آئی رہنما نے کہاکہ یہ بدقسمتی کی بات ہے کہ امریکی صدر بائیڈن کی حکومت اپنے آخری وقت میں بھی دہرا معیار برقرار رکھے ہوئے ہے۔
واضح رہے کہ امریکا نے پاکستان کے بیلسٹک میزائل پروگرام میں مدد فراہم کرنے والی 4 کمپنیوں پر پابندی عائد کی ہے۔
ان کمپنیوں میں اسلام آباد میں قائم نیشنل ڈیولپمنٹ کمپلیکس (NDC)، اختراینڈ سنز پرائیویٹ لمیٹڈ، راک سائیڈ انٹرپرائز اور ایفیلئیٹس انٹرنیشنل شامل ہیں۔
دوسری جانب پاکستان نے امریکا کی جانب سے بیلسٹک میزائل پروگرام میں مدد دینے کے الزام میں چار اداروں پر پابندی کے اقدام کو متعصبانہ قرار دیا ہے۔
یہ بھی پڑھیں پاکستان نے بیلسٹک میزائل پروگرام سے متعلق امریکی پابندیوں کو متعصبانہ قرار دیدیا
اپنے ردعمل میں دفتر خارجہ کی ترجمان ممتاز زہرا بلوچ نے کہا کہ اداروں پر پابندیاں عائد کرنے کا متعصبانہ امریکی فیصلہ امتیازی طرز عمل، علاقائی اور عالمی سلامتی کے لیے خطرہ ہے، پابندیوں کا تازہ امریکی اقدام امن اور سلامتی کے مقصد سے انحراف کرتا ہے، پابندیوں کا مقصد فوجی عدم توازن کو بڑھانا ہے۔
