پاکستان تحریک انصاف (پی ٹی آئی) کے بانی چیئرمین کی بہن علیمہ خان نے کہا ہے کہ عمران خان بنی گالہ ہاؤس اریسٹ میں جائیں گے نہ اسٹیبلشمنٹ یا کسی ملک کے کہنے پر کوئی ڈیل کریں گے، 26 نومبر کے بے شمار لوگ لاپتا ہیں، لال مسجد آپریشن کی طرح لاشیں دفنائی گئی ہیں۔
یہ بھی پڑھیں: جج کے رویے سے لگ رہا ہے عمران خان کو 190 ملین پاؤنڈز کیس میں سزا سنا دی جائے گی، علیمہ خان
اڈیالہ جیل کے باہر میڈیا سے گفتگو کرتے ہوئے بانی پی ٹی آئی عمران خان کی ہمشیرہ علیمہ خان نے کہا کہ توشہ خانہ ٹو کیس توشہ خانہ کے پہلے کیس جیسا ہی ہے، القادر ٹرسٹ کیس اور توشہ خانہ ٹو اعلیٰ عدالتوں میں ختم ہو جائیں گے، القادر یونیورسٹی کیس کا فیصلہ 6 تاریخ کو سنایا جائے گا۔
علیمہ خان نے کہا کہ عمران خان نے ان سے گفتگو میں کہا کہ عدلیہ کا مذاق بنایا گیا ہے لیکن وہ ہر کیس لڑیں گے، انہیں ڈیل کرنے کی کیا ضرورت ہے جب وہ سارے مقدمات لڑرہے ہیں، وہ اسٹیبلشمنٹ یا کسی ملک کے کہنے پر ڈیل نہیں کریں گے نہ وہ بنی گالہ ہاؤس اریسٹ میں جائیں گے۔
یہ بھی پڑھیں: حکومت نے کس موقع پر عمران خان کو رہا کرنے کی آفر کی؟ علیمہ خان نے بتا دیا
انہوں نے کہا کہ بانی پی ٹی آئی نے نے کہا کہ 9 مئی کی سازش پہلے سے تیار کی گئی تھی، ان لوگوں نے 9 مئی کی سی سی ٹی وی فوٹیج چرائی اور جن لوگوں نے 9 مئی کے بعد پارٹی چھوڑی ان کے کیسز معاف کردیے گئے ہیں، عمران خان نے 9 مئی اور 26 نومبر کے احتجاج پر جوڈیشل کمیشن بنانے اور بے گناہ قیدیوں کی رہائی کا مطالبہ کیا ہے۔
انہوں نے کہا کہ 26 نومبر کے لاتعداد لوگ لاپتا ہیں، جبکہ لال مسجد آپریشن کی طرح لاشیں دفنائی گئی ہیں۔
