گلگت بلتستان میں احتجاج کرنے والی عوامی ایکشن کمیٹی نے 19 نکاتی ایجنڈا پیش کردیا ہے۔
گلگت بلتستان کی عوامی ایکشن کمیٹی نے گزشتہ روز گلگت اتحاد چوک میں احتجاجی جلسہ منعقد کیا، جس میں 19 نکاتی ایجنڈا پیش کیا گیا۔
یہ بھی پڑھیں: گلگت بلتستان: سول سوسائٹی نے گندم کی قیمتوں میں اضافے کا فیصلہ مسترد کر دیا، تحریک کا اعلان
احتجاجی مظاہرے سے خطاب کرتے ہوئے عوامی ایکشن کمیٹی کے رہنما احسان ایڈووکیٹ نے کہا کہ اس وقت عوام کو سب سے بڑا مسئلہ بجلی کی شدید قلت ہے، خاص طور پر گلگت، ہنزہ اور اسکردو جیسے علاقوں میں بدترین لوڈ شیڈنگ جاری ہے۔
انہوں نے کہا کہ دوسرا اہم مسئلہ زمینوں کی ملکیت کا ہے، جہاں بنجر زمین، ندی نالے اور پہاڑ حکومت نے اپنی ملکیت ظاہر کیے ہیں، حالانکہ یہ زمینیں عوام کی ہیں، ان زمینوں پر قبضہ کیا جارہا ہے۔
ان کا کہنا تھا کہ عوامی ایکشن کمیٹی کا تیسرا اہم مطالبہ معدنیات سے متعلق ہے، جہاں مقامی لوگوں کی مرضی کے بغیر مختلف کمپنیوں کو لیز دی جا رہی ہے۔
احسان ایڈوکیٹ نے نوجوانوں کی بے روزگاری کو بھی ایک سنگین مسئلہ قرار دیا اور کہا کہ سوست پورٹ پر چھوٹے کاروبار کرنے والوں پر پابندی لگا دی گئی ہے، جس سے صرف بڑی کمپنیوں کو فائدہ ہورہا ہے جبکہ گلگت بلتستان کے نوجوان بے روزگار ہو رہے ہیں اور ان کے لیے مواقع محدود ہو رہے ہیں۔
یہ بھی پڑھیں: جموں کشمیر جوائنٹ عوامی ایکشن کمیٹی کی حکومت کو ’پی اے پی او‘ واپس لینے کے لیے ڈیڈ لائن
انہوں نے مزید کہا کہ عوامی طاقت سے 27 جنوری 2024 کو گندم سبسڈی کو بحال کرایا گیا تھا، جس سے ظاہر ہوتا ہے کہ عوامی مزاحمت کے ذریعے ہی مطالبات منوائے جاسکتے ہیں، لیکن موجودہ حکومت پر کوئی بھروسہ نہیں کیا جاسکتا کیونکہ یہاں لوٹ مار کا بازار گرم ہے۔
انہوں نے کہا آل پارٹیز کانفرنس کے بعد گلگت بلتستان بھر میں دوبارہ احتجاج کی کال دی جائے گی اور عوامی طاقت کے ذریعے اپنے حقوق کے لیے جدوجہد جاری رہے گی۔
