آپ نے سونا، چاندی سمیت قیمتی اشیا کی ڈکیتی تو سنی ہوگی، لیکن کوئٹہ کی تاریخ میں پہلی بار قدیم قرآنی نسخے چوری ہوگئے۔
21 اور 22 جنوری کی درمیانی شب جبل نور القرآن سے چور رات کی تاریکی کا فائدہ اُٹھاتے ہوئے قرآن کریم کے 150 سے زائد قلمی نسخے لے اُڑے۔ چوری ہونے والے نایاب نسخے تقریباً 600 سو سال قدیم تھے۔
وی نیوز سے بات کرتے ہوئے جبل نور القرآن کے انچارج نے بتایا کہ چوری کے اس واقعے نے دل دہلا دیا ہے۔ رات کو چور آئے اور قدیم قرآنی نسخے لے گئے۔ ہم نے واقعے کا مقدمہ بروری پولیس اسٹیشن میں درج کروا دیا ہے۔
پولیس کے مطابق ملزمان کی تلاش کے لیے قریبی عمارتوں میں نصب سی سی ٹی وی کیمروں کی مدد لی جا رہی ہے۔ امید ہے کہ ملزمان جلد گرفتار کر لیے جائیں گے۔
واضح رہے کہ جبل نور القرآن کوئٹہ کے مغربی بائی پاس کے چلتن پہاڑ کے دامن میں واقع ہے، جہاں صدیوں پرانے قدیم قرآنی نسخوں سمیت شہید قرآن پاک بھی محفوظ کئے گئے تھے۔
