نائب وزیراعظم اسحاق ڈار نے آج نیویارک میں سعودی نائب وزیر خارجہ انجینئرعبدالکریم الخیریجی سے مُلاقات کی۔ دونوں سربراہان نے دیرینہ سعودی پاک تعلقات کے حوالے سے اپنے غیر متزلزل عزم کا اظہار کرتے ہوئے، مستقبل میں سکیورٹی اور معاشی تعلقات کو مزید مضبوط کرنے کے عزم کا اعادہ بھی کیا۔
اسحاق ڈار نے سعودی ولی عہد محمد بن سلمان اور سعودی فرمانروا شاہ سلمان بن عبدالعزیز السعود کی وژنری قیادت کے زیر اثر سعودی عرب کی شاندار ترقی اور علاقائی، عالمی امن کے حوالے سے سعودی عرب کے مرکزی کردار کی تعریف کی۔
یہ بھی پڑھیےسعودی عرب پاکستان میں مزید 600 ملین ڈالر کی سرمایہ کاری کرے گا، دونوں ممالک میں اتفاق
دونوں مُلکوں کے مابین گہرے تزویراتی اور معاشی تعلقات کو مدنظر رکھتے ہوئے دونوں مُلکوں نے معاشی تعاون کو مزید وسعت دینے، تجارت، سرمایہ کاری اور کمرشل شعبوں میں تعاون کو مزید وسعت دینے پر اتفاق کرتے ہوئے کہا کہ پاکستان میں سرمایہ کاری کے وسیع مواقع موجود ہیں۔
دونوں رہنماؤں نے مشرقِ وسطیٰ کی حالیہ صورتحال بالخصوص غزہ اور مغربی کنارے پر انسانی صورتحال کے بارے میں تبادلہ خیال کیا۔
اُنہوں نے کہا کہ غزہ میں جنگ بندی پر پوری طرح سے عمل درآمد ہونا چاہیے، اِس کے ساتھ ساتھ غزہ کے لوگوں تک انسانی امداد کی رسائی میں کوئی رکاوٹ نہیں ہونی چاہیے، اور غزہ میں تعمیر نو کا کام جلد شروع ہونا چاہیے۔ دونوں سربراہان نے فلسطین میں دو ریاستی حل کی جانب جلد پیش رفت پر بھی زور دیا۔
یہ بھی پڑھیےپاکستان سعودی عرب کے وژن 2030 سے سیکھنے کے لیے پُرعزم ہے، وزیر خزانہ محمد اورنگزیب
دونوں رہنماؤں نے مسلمہ اُمہ کو درپیش مسائل کے حوالے سے او آئی سی کے مزید فعال کردار پر بھی زور دیا۔
مُلاقات میں دونوں مُلکوں کی ترقی اور استحکام کے لیے پاکستان اور سعودی عرب کی کثیرالجہتی شراکت داری کو اور مضبوط کرنے کے عزم کا اعادہ بھی کیا گیا۔
