پاکستان کے سابق اسٹار فاسٹ بولر شعیب اختر نے 2004 میں پاکستان کے خلاف اپنی 300 رنز کی اننگز کو بار بار یاد کرنے پر ہندوستان کے وریندر سہواگ کی کلاس لے لی، اور کہا کہ وریندرا سہواگ پچھلے 20 سال سے ایک ہی ٹیپ چلا رہے ہیں۔
یہ معاملہ اس وقت شروع ہوا جب سہواگ نے انسٹاگرام پر ایک کمرشل کا ویڈیو کلپ شیئر کیا، جس میں وہ ایک ہی رٹ لگائے ہوئے تھے کہ میں نے ملتان ٹیسٹ میں پاکستان کے خلاف 300 رنز اسکور کیے تھے۔ اور پوسٹ کیپشن میں اپنی ٹرپل سنچری کا حوالہ دیا۔
واضح رہے کہ وریندرا سہواگ نے 375 گیندوں پر 309 رنز بنائے تھے۔ اس ٹرپل سینچری کی بدولت بھارت نے وہ میچ ایک اننگز اور 52 رنز سے جیت لیا تھا۔
وریندرا سہواگ کے ہر وقت ٹرپل سینچری کا ذکر کرنے سے بالآخر شعیب اختر کی قوت برداشت جواب دے گئی۔ انہوں نے بھی سوشل میڈیا پر ایک ویڈیو اپ لوڈ کردی۔ جس میں وہ وریندر سہواگ کو مخاطب کرکے کہتے ہیں:
View this post on Instagram
’آج ایک ویڈیو دیکھی ہے ویرو بھا جی کی۔ یار! تنگ آ گیا ہوں اس کی باتیں سن سن کے۔ بیس سال سے ایک ہی ٹیپ چلائے جا رہا ہے کہ300، 300۔‘
’ارے بھائی! میں بھی وہیں تھا جب تم نے 300 رنز کیے تھے۔ میں بھی دیکھ رہا تھا اور پورا پاکستان بھی دیکھ رہا تھا۔ تم بہت اچھا کھیلے تھے، بہت ٹاپ کلاس کھیلے تھے۔ لیکن بھائی! روزہ رکھا ہوتا ہے اور اس وقت دماغ کی بالکل ہٹی ہوتی ہے۔ اس لیے بس کردو۔‘
’اگر تجھے گینز بک میں انٹری چاہیے 300 رنز کی۔ میں تیرے لیے یہ کام کراسکتا ہوں۔ تجھے پتہ ہے کہ میرا وہاں ایک تعلق ہے۔ میری تیری انٹری کروا سکتا ہوں کہ دنیا میں سب سے زیادہ 300، 300 کرنے والا وریندرا سہواگ ہے۔ اگر تو گینز بک میں انٹری کروانا چاہتا ہے تو مجھ سے بات کرو۔ کیونکہ اپنے پاس ایک اصلی ریکارڈ ہے۔ تو جانتا ہے نا کہ وہ کون سا ریکارڈ ہے۔‘
شعیب اختر نے انسٹاگرام پر اپنی ویڈیو پوسٹ کے ساتھ کیپشن میں بھارت کی آن لائن شاپنگ کمپنی کو بھی مخاطب کیا جس نے اپنی کمرشل میں وریندرا سہواگ کو شامل کیا تھا۔ شعیب اختر نے لکھا کہ ایف ڈبلیو ڈی والو! اگلے اشتہار میں کسی اسٹائلش بندے کو لینا، ہاہاہا۔
