نائب وزیراعظم و وزیر خارجہ اسحاق ڈار نے کہا ہے کہ دریائے سندھ سے کینالز نکالنے کے معاملے پر غلط فہمیاں دوری کی جائیں گے، حکومت اپنے اتحادیوں کے اعتراضات دور کرے گی۔
قومی اسمبلی میں اظہار خیال کرتے ہوئے انہوں نے کہاکہ وزیراعظم کہ ہدایت پر قائم کمیٹی اتحادیوں کے معاملات پر غور کررہی ہے، اور سندھ کے ترقیاتی منصوبوں کی بھی منظوری دی جارہی ہے۔
یہ بھی پڑھیں دریائے سندھ سے کینالز نہیں نکالنے دیں گے، وزیراعلیٰ سندھ کی وفاقی حکومت گرانے کی دھمکی
انہوں نے کہاکہ حکومت معاہدے پر من و عن عمل کرنے کی پابند ہے، کینالز کے مسئلے پر مشاورت جاری ہے، جو بھی حل نکلے گا اس میں ملکی مفاد کو ترجیح دی جائے گی۔
اسحاق ڈار نے کہاکہ نہروں کا معاملہ سب سے پہلے ایکنک میں آیا تھا، لیکن غلط فہمیوں سے بچنے کے لیے ایجنڈا مؤخر کردیا گیا تھا۔
انہوں نے کہاکہ نہروں کے معاملے پر دونوں اطراف سے لفظی گولہ باری ہوتی ہے، اور اس ساری صورت حال سے اندرون سندھ کے کچھ عناصر فائدہ اٹھا رہے ہیں۔
انہوں نے کہاکہ وزیر اطلاعات پنجاب عظمیٰ بخاری کا نہروں کے معاملے پر بیان محدود ہوتا تو بہتر تھا، اس معاملے پر وزیراعلیٰ سندھ سے بات ہوئی ہے، جبکہ وزیراعظم نے نہروں کے مسئلے پر کمیٹی بھی تشکیل دی ہے۔
انہوں نے کہاکہ ہم ملک کی خاطر مسائل مل کر حل کرنے پر یقین رکھتے ہیں، لیکن پنجاب اگر اپنے حصے کے پانی پر کچھ بنانا چاہتا ہے تو بنانے دینا چاہیے۔
یہ بھی پڑھیں ہم کسی صوبے کا پانی نہیں لے رہے، مریم نواز دریائے سندھ سے کینالز نکالنے کے معاملے پر بول پڑیں
واضح رہے کہ دریائے سندھ سے کینالز نکالنے کے معاملے پر سندھ اور پنجاب آمنے سامنے ہیں، جبکہ پیپلزپارٹی نے تحریک چلانے کا اعلان کرتے ہوئے کہا ہے کہ کچھ بھی ہو جائے کینالز نہیں نکالنے دیں گے۔
