خیرپور کے علاقے ٹھری میرواہ میں نامعلوم ملزمان کے حملے میں صحافی اے ڈی شر جاں بحق ہوگئے۔
مقامی پولیس کے مطابق مقتول صحافی کی لاش گوٹھ علی آباد سے برآمد ہوئی جسے اسپتال منتقل کردیا گیا ہے جبکہ واقعے کی تحقیقات بھی جاری ہیں۔
یہ بھی پڑھیے: نوشہرہ میں نامعلوم موٹرسائیکل سواروں کی فائرنگ سے صحافی قتل
پولیس کے مطابق مقتول کو کلہاڑیوں کے وار سے قتل کیا گیا ہے، مقتول کے چہرے پر بھی تشدد کے نشانات تھے۔
اہل خانہ کے بیانات کے بعد مقتول صحافی کے قریبی دوست کو تفتیش کے لیے تحویل میں لیا گیا ہے جبکہ واقعے کے خلاف خیرپور یونین آف جرنلسٹس نے 3 روزہ سوگ کا اعلان کیا ہے۔
اے ڈی شر کے قتل پر وزیر داخلہ سندھ ضیا الحسن لنجار نے ایس ایس پی خیرپور سے رپورٹ طلب کرلی ہے اور موثر اور کامیاب تفتیش کرنے کی ہدایت کردی ہے۔
صوبائی وزیرداخلہ نے یہ بھی کہا ہے کہ صحافی کے قتل کی تحقیقات کو پریس کلب کے اراکین کو اعتماد میں لے کر آگے بڑھایا جائے۔
