ملک میں ایک بار پھر بارش اور ژالہ باری کا آغاز ہوگیا ہے، اسلام آباد کے مختلف علاقوں میں بارش کے علاوہ خیبرپختونخوا میں تیز ہواؤں کے ساتھ بارش اور ژالہ باری ہوئی ہے جس سے گاڑیوں کے شیشے ٹوٹ گئے۔
میڈیا رپورٹس کے مطابق خیبرپختونخوا کے صدر مقام پشاور سمیت ضلع خیبر کے کچھ علاقوں میں تیز ہواؤں کے ساتھ موسلا دھار بارش اور ژالہ باری ہوئی۔
یہ بھی پڑھیں اسلام آباد میں شدید ژالہ باری، ونڈ اسکرین کا اسٹاک ختم، قیمتیں کئی گنا بڑھ گئیں
ضلع خیبر کے علاقوں باڑہ، جمرود اور لنڈی کوتل میں ژالہ باری سے گاڑیوں کے شیشے ٹوٹنے کے علاوہ سولر پینلز کو بھی نقصان پہنچا ہے۔ جبکہ طورخم کے علاقوں میں بھی گاڑیوں کے شیشوں کو نقصان پہنچنے کی اطلاعات ہیں۔
میڈیا رپورٹس کے مطابق ملک کے بالائی علاقوں میں گرج چمک کے ساتھ بارش اور ژالہ باری سے گرمی کا زور ٹوٹ گیا اور موسم خوشگوار ہوگیا ہے، تاہم برساتی نالوں میں طغیانی آگئی جس سے کئی علاقے زیر آب آگئے ہیں۔
واضح رہے کہ ایک روز قبل اسلام آباد و گردونواح میں موسلا دھار بارش اور شدید ژالہ باری ہوئی تھی، جس سے گاڑیوں کے شیشے ٹوٹنے کے علاوہ گھروں میں بھی شیشوں کو نقصان پہنچا تھا، اسلام آباد کی مشہور فیصل مسجد کے شیشے بھی ٹوٹ گئے تھے۔
یہ بھی پڑھیں ژالہ باری کے دوران سولر پینلز اور گاڑیوں کے شیشوں کو کیسے محفوظ بنایا جا سکتا ہے؟
اب محکمہ موسمیات نے 18 سے 20 اپریل تک ملک کے مختلف علاقوں میں تیز ہواؤں اور گرج چمک کے ساتھ موسلا دھار بارش اور ژالہ باری کی پیشگوئی کی ہے۔
