فلسطینی صدر محمود عباس، غزہ کے عیسائی برادری اور حماس قیادت نے پوپ لیو چہاردہم سے مطالبہ کیا ہے کہ وہ اپنے پیش رو پوپ فرانسس کے امن اقدامات کو جاری رکھیں۔
ویٹی کن کی جانب سے پوپ لیو چہاردہم کے انتخاب کے اعلان کے بعد محمود عباس نے اپنے بیان میں کہا کہ وہ نئے پوپ کو نیک خواہشات پیش کرتے ہیں اور امید کرتے ہیں کہ وہ پوپ فرانسس کی وراثت کو آگے بڑھائیں گے۔
انہوں نے ویٹی کن کے اخلاقی، مذہبی اور سیاسی کردار کو سراہتے ہوئے کہا کہ فلسطینی عوام کے حقِ آزادی اور خودمختاری کا دفاع ان ترجیحات میں سرفہرست ہونا چاہیے۔
پوپ لیو چہاردہم جن کا اصل نام کارڈینل رابرٹ پیریوسٹ ہے، کا تعلق شکاگو سے ہے اور وہ کیتھولک چرچ کی قیادت سنبھالنے والے پہلے امریکی ہیں۔
مزید پڑھیں: پوپ لیو چہاردہم: ایک ارب 40 کروڑ کیتھولک عیسائیوں کے نئے روحانی پیشوا کون ہیں؟
غزہ میں عیسائی برادری نے بھی پوپ کے انتخاب پر خوشی کا اظہار کرتے ہوئے امید ظاہر کی کہ وہ بھی غزہ کو اسی طرح اہمیت دیں گے جیسا کہ پوپ فرانسس دیتے تھے۔
ہولی فیملی چرچ کے ایمرجنسی کمیٹی کے سربراہ، 44 سالہ جارج انتون نے رائٹرز کو بتایا کہ ہم خوش ہیں کہ نئے پوپ کا انتخاب ہوا۔ ہمیں امید ہے کہ ان کا دل بھی غزہ کے لیے ویسا ہی دھڑکے گا جیسا پوپ فرانسس کا دھڑکتا تھا۔ ہم ان سے اپیل کرتے ہیں کہ وہ غزہ کو پوپ فرانسس کی نگاہوں سے دیکھیں اور ان کے دل سے محسوس کریں۔
پوپ فرانسس نے اکتوبر 2023 میں غزہ میں جنگ شروع ہونے کے بعد روزانہ ہولی فیملی چرچ فون کیا کرتے تھے، جو ان کی ہمدردی اور وابستگی کی علامت تھی۔
حماس نے بھی نئے پوپ کو مبارک باد دیتے ہوئے بیان میں کہا ہے کہ وہ امید کرتی ہے کہ پوپ لیو چہاردہم، مظلوموں کی حمایت اور غزہ میں جاری نسل کشی کے خلاف آواز بلند کرنے کی راہ کو جاری رکھیں گے۔
ہولی فیملی چرچ غزہ میں 450 عیسائیوں کے لیے پناہ گاہ فراہم کرتا ہے، جبکہ اسی احاطے میں بچوں اور بزرگوں کے لیے قائم پناہ گاہ میں 30 مسلمان بھی مقیم ہیں۔ غزہ کی 23 لاکھ آبادی میں اندازاً صرف 1,000 عیسائی رہ گئے ہیں، جن میں اکثریت یونانی آرتھوڈوکس فرقے سے تعلق رکھتی ہے۔
