ایک 24 سالہ چینی خاتون روانی سے انگریزی بولنے کی صلاحیت اچانک کھو بیٹھیں جس نے معالجین کو حیران کردیا۔
یہ بھی پڑھیں: کیا مرد دماغی طور پر خواتین سے پہلے بوڑھا ہو جاتا ہے؟
چینی میڈیا کے مطابق چین کے شہر گوانگ ڈونگ کے پروونشل پیپلز اسپتال کے شعبہ نیورو سرجری کے ڈائریکٹر وان فینگ نے ایک 24 سالہ خاتون کی ایک ویڈیو پوسٹ کی جو کلاس کے دوران اچانک بیمار ہو گئی تھیں جس کی وجہ سے ان میں ایک بہت ہی عجیب و غریب علامت پیدا ہو گئی تھی۔
چینی ڈاکٹر حیران رہ گئے کیوں کہ وہ خاتون اب انگریزی بولنے سے قاصر ہیں حالاں کہ اس سے قبل وہ انگریزی روانی سے بول سکتی تھیں۔
اس عجیب بیماری کے باعث خاتون انگریزی پڑھ اور سمجھ سکتی تھیں لیکن بول نہیں سکتی تھیں۔
مزید پڑھیے: انسانی دماغ میں اے آئی ٹیکنالوجی کی کامیاب پیوند کاری، کیا اب انسان بھی کمپیوٹر بن جائے گا؟
ڈاکٹر وان فینگ کا کہنا ہہے کہ وہ خاتون مینڈارن اور کینٹونیز بول سکتی تھی لیکن انگریزی نہیں بول سکتی تھی۔ کیونکہ وہ ایک سال سے زیادہ عرصے سے بیرون ملک تعلیم حاصل کر رہی تھیں اس وجہ سے ان کی انگریزی بہت اچھی تھی۔
انگلش کا ایک لفظ بھی بولنے سے محروم ہوجانے پر خاتون گھبراگئی تھیں جس پر انہوں نے معالجین سے رابطہ کیا۔ انہیں گوانگ ڈونگ پروونشل پیپلز اسپتال کے شعبہ نیورو سرجری میں داخل کرایا گیا۔ پہلے تو ڈاکٹروں کو شبہ تھا کہ ٹیومر نے ان کے دماغ کے زبان بولنے کے فنکشن کو متاثر کیا ہے لیکن ایم آر آئی سے پتا چلا کہ خاتون کے دماغ کے بائیں موٹر ایریا میں ہیمرج ہوگیا ہے اور خون بہنے کی وجہ سے ان کی انگریزی بولنے کی صلاحیت متاثر ہوچکی ہے۔
مزید پڑھیں: مراقبہ سے کیسے دماغی صلاحیت بہتر بنائی جا سکتی ہے؟
خاتون کے دماغ کا آپریشن کیا گیا جس کے بعد اب وہ پہلے کی طرح انگریزی بولنے لگی ہیں اور اب بیرون ملک اپنی تعلیم بھی جاری رکھ سکیں گی۔
