وفاقی وزارت مذہبی امور اسلام آباد کے سیکریٹری ڈاکٹر عطاالرحمان مکہ مکرمہ پہنچ گئے، جہاں انہوں نے حج 2025 کے سلسلے میں پاکستانی عازمینِ حج کے لیے کیے گئے انتظامات کا جائزہ لیا۔ اس اعلیٰ سطحی دورے کا مقصد عازمین کے لیے سہولیات کو یقینی بنانا اور حج کے دوران ان کے آرام و اطمینان کو ممکن بنانا تھا۔
یہ بھی پڑھیں وفاقی وزیر مذہبی امور کی مدینہ منورہ آمد، پوسٹ حج انتظامات کا جائزہ لیا
وفاقی سیکریٹری کے ہمراہ چیف کوآرڈینیٹر مکہ ڈاکٹر مرزا علی محسود، کوآرڈینیٹر ایف اینڈ سی سجاد حیدر یلدرم، کوآرڈینیٹر مکہ ذوالفقار خان اور ڈائریکٹر مکہ عزیزاللہ خان بھی موجود تھے۔
وفد نے عرفات اور منیٰ کے کیمپس کا تفصیلی دورہ کیا جہاں پاکستانی عازمین کو ٹھہرایا جائے گا۔ اس موقع پر رہائش، صفائی، خوراک کی تقسیم اور طبی سہولیات سمیت تمام بنیادی انتظامات کا بغور جائزہ لیا گیا تاکہ تمام سہولیات اعلیٰ معیار کی ہوں اور سعودی حکام کے ساتھ مکمل ہم آہنگی کے تحت فراہم کی جائیں۔
میڈیا سے گفتگو کرتے ہوئے وفاقی سیکریٹری نے کہاکہ حکومت پاکستان عازمین حج کو ہر ممکن سہولیات فراہم کرنے کے لیے پُرعزم ہے، اور اس مقصد کے لیے مانیٹرنگ اور فوری رابطے کا نظام فعال رکھا گیا ہے۔
یہ بھی پڑھیں حج انتظامات مکمل، 66 ہزار سے زیادہ عازمین سعودیہ پہنچ گئے: ترجمان مذہبی امور
یہ دورہ وزارت مذہبی امور کی جانب سے حج انتظامات میں سنجیدگی اور عازمین کی خدمت کے جذبے کا عملی مظاہرہ ہے۔
