حکومت نے مقامی آٹو موبائل سیکٹر کو فروغ دینے کے لیے بجٹ 26-2025 میں اہم اقدامات کا اعلان کیا ہے۔ نئے اعلانات کے تحت، مقامی گاڑیوں کے انجن کی درآمد پر ڈیوٹی میں 5 فیصد کمی کر دی گئی ہے۔
اس اقدام کا مقصد گاڑیوں کی مقامی تیاری کے عمل میں استعمال ہونے والے انجنوں کی لاگت کو کم کرنا ہے تاکہ پیداواری لاگت میں کمی لائی جا سکے۔
اس کے علاوہ، مقامی گاڑیوں کی تیاری میں استعمال ہونے والے خام مال اور سی کے ڈی کٹس پر ڈیوٹی کو بھی 20 فیصد سے کم کر کے 15 فیصد کر دیا گیا ہے۔ یعنی 5 فیصد کی کمی کی گئی ہے۔
یاد رہے کہ حکومت نے 25-2024 کے بجٹ میں نئی گاڑیوں پر ودہولڈنگ ٹیکس میں اضافے کی تجویز کی تھی۔ بجٹ میں گاڑیوں کے نئے رجسٹریشن چارجز کے حساب کتاب میں تبدیلی متعارف کرائی گئی تھی۔
واضح رہے کہ اس سے قبل رجسٹریشن چارجز گاڑیوں کے انجن کے سائز پر مبنی تھے۔ تاہم بجٹ 25-2024 کے مطابق رجسٹریشن چارجز کا حساب انجن کپیسٹی کی بجائے گاڑی کے انوائس کی قیمت کی بنیاد پر رکھا گیا تھا۔
