صوبائی وزیر خزانہ اور دیگر وزراء نے آئندہ مالی سال 2025-26 کے بجٹ پر میڈیا کو بریفنگ دیتے ہوئے بتایا کہ بجٹ کا مجموعی حجم 1028 ارب روپے ہے جس میں 51.1 ارب روپے سرپلس دکھایا گیا ہے۔
یہ بھی پڑھیں:بجٹ 26-2025 کے بعد، اوورسیز پاکستانیوں کے مسائل حل ہو جائیں گے ؟
غیر ترقیاتی اخراجات کے لیے 639 ارب روپے جبکہ ترقیاتی مد میں 249.5 ارب روپے مختص کیے گئے ہیں۔ بجٹ میں 2550 نئی اسکیمات کے لیے 137.6 ارب اور 3633 جاری اسکیمات کے لیے 141.9 ارب روپے رکھے گئے ہیں۔
وفاقی محصولات سے صوبے کو 801 ارب روپے، صوبائی محصولات سے 101 ارب، اور سوئی گیس لیز سے 24 ارب روپے کی آمدن متوقع ہے۔
مزید برآں، بجٹ میں 6 ہزار نئی کنٹریکٹ اور ریگولر آسامیاں تخلیق کی گئی ہیں۔
سرکاری ملازمین کی تنخواہوں میں اضافہ، نوجوانوں اور تعلیم پر توجہ
کوئٹہ: صوبائی بجٹ 2025-26 میں گریڈ 1 سے 22 تک کے تمام سرکاری ملازمین کی بنیادی تنخواہوں میں 10 فیصد اضافے کی تجویز دی گئی ہے، جبکہ ریٹائرڈ ملازمین کی پنشن میں 7 فیصد اضافہ کیا گیا ہے۔ ڈسپیریٹی ریڈکشن الاؤنس (ڈی آر اے) کو 20 فیصد تک بڑھانے کی تجویز بھی شامل ہے۔
بلوچستان پنشن فنڈ کے لیے 1 ارب، ہیلتھ کارڈ پروگرام کے لیے 4.5 ارب، اور ہنرمند نوجوانوں کو بیرون ملک بھیجنے کے لیے 5 ارب روپے مختص کیے گئے ہیں۔
تعلیم کے شعبے میں، بلوچستان انڈومنٹ فنڈ کے لیے 4 ارب اور ایجوکیشن فنڈ کے لیے 1 ارب روپے رکھے گئے ہیں۔ بجٹ میں کسی نئے ٹیکس کا نفاذ نہیں کیا گیا۔
