پاکستان آئندہ ماہ جولائی 2025 میں اقوام متحدہ کی سلامتی کونسل کی صدارت سنبھالے گا۔
اقوام متحدہ کے چارٹر کے تحت یہ صدارت ہر ماہ باری باری رکن ممالک کو دی جاتی ہے، اور جولائی کا مہینہ پاکستان کے حصے میں آیا ہے۔
یہ بھی پڑھیں:اسرائیلی اقدامات خطے کے امن کے لیے خطرناک ثابت ہو رہے ہیں، پاکستان
اقوام متحدہ میں پاکستان کے مستقل مندوب، سفیر عاصم افتخار احمد نے اس سلسلے میں اقوام متحدہ کے سیکریٹری جنرل انتونیو گوتریس سے نیویارک میں واقع اقوام متحدہ کے صدر دفتر میں اہم ملاقات کی۔
ملاقات میں انہوں نے جولائی کے لیے سلامتی کونسل کے مجوزہ پروگرام آف ورک پر تفصیلی بریفنگ دی۔
ملاقات کے دوران عالمی امن و سلامتی کو درپیش فوری نوعیت کے چیلنجز، خاص طور پر مشرق وسطیٰ، افریقہ، ایشیا، یورپ اور لاطینی امریکا کی بدلتی صورتِ حال پر گفتگو کی گئی۔
اس کے ساتھ ساتھ اقوام متحدہ کے امن مشنز کے کردار اور سلامتی کونسل کے مقاصد کے فروغ پر بھی تبادلہ خیال ہوا۔
سفیر عاصم افتخار نے زور دے کر کہا کہ پاکستان اپنی صدارت کھلے، شفاف اور مشاورتی انداز میں انجام دے گا۔
اُن کا کہنا تھا کہ اقوام متحدہ کے چارٹر کے مقاصد و اصولوں کی پاسداری اور پرامن سفارتی ذرائع سے تنازعات کے حل کے لیے پاکستان پرعزم ہے۔
یہ بھی پڑھیں:لیفٹیننٹ جنرل عاصم ملک کا دورہ چین، پاکستان اور چین کا سیکیورٹی تعاون بڑھانے پر اتفاق
انہوں نے مزید کہا کہ عالمی سطح پر پیچیدہ چیلنجز سے نمٹنے کے لیے اجتماعی کوششوں، کثیرالجہتی سفارت کاری، اور تنازعات کی روک تھام سے متعلق اقوام متحدہ کے سیکریٹری جنرل کی کاوشوں کی پاکستان بھرپور حمایت کرتا ہے۔
